Diyardeya bikaranîna kenarên kolanan pirsgirêkek e

OLVA HAC MENSÛR /HESEKÊ

Dukandarên navçeya Dirbêsiyê ya girêdayî kantona Hesekê tiştên xwe li ser kenarên kolanan li pêşiya dukanên xwe radixînin. Di encamê de welatî neçarî dimînin di nîvê kolanan re bimeşin û hatûçûn dijwar dibe û dibe sedema gelek qezayên trafîkê. Her wiha gelek firoşkarên din jî li ser kenaran tiştên xwe û sebzeyê radixînin.

Tişta ku welatiyên navçeyê matmayî dihêle ew e ku Şaredariyê bi biryarekê derfet da van dukandar û firoşkaran ku nîvê kenara kolanan bikar bînin û bi taybet di bazaran de, tevî ku panbûna kenarê kêmtirî 2 mîtreyan e.

Welatiyê bi navê Hemdullah Hisên girêdayî mijarê wiha got: "Em nikarin serdana bazarê bikin û şaredariya gel jî ti çareserî peyda nekiriye û tenê cezayan li dukandaran dixîne."

Hemîd Îbrahîm jî der barê heman mijarê de diyar kir ku piraniya kenarên kolanan ji aliyê dukandaran ve tên bikaranîn û êdî kenar veguherine bazareke serbixwe û wiha anî ziman: "Em bang li Şaredariya Gel dikin ku çareseriyekê ji vê pirsgirêkê  re peyda bike."

Dukandar jî bi hinceta ku dukanên wan bi çûk in kenara kolanê bikar tînin û welatî jî vê yekê weke hincet nabînin.

Firoşkarên sebzeyê jî diyar kirin ku wan bi erêkirina şaredariyê sebzeyê li ser kenaran difiroşin.

Cîgirê hevserokatiya Şaredariya Gel a naveçya Dirbêsiyê Mihemed Elî ji ANHA'yê re axivî û got ku pirsgirêka bikaranîna kenarên kolanan pirsgirêkek kevin e û ew weke şaredarî hewl didin vê pirsgirêkê çareser bikin.

ANHA