Komîteya Çand û Hunerê ya Minbicê pêşangeheke şêwekariyê organîze dike

MINBIC

Bi boneya duyemîn salvegera rizgarkirina herêma Minbicê ji destên çeteyên DAIŞ'ê Komîteya Çand û Hunerê ya Minbicê û Gundewarê Wê li şanogeha Minbicê ya li ser rêya Helebê pêşangeheke şêwekariyê li dar dixe. Di pêşangehê de gelek hunermend û şêwekarên Minbicê beşdar bûne. Di pêşangehê de her wiha dîmenên stranên kevnar û folklorîk ên herêmê û helbest û şanoyek hatin pêşandan.

Di merasîma vekirina pêşangehê de hevseroka Meclisa Rêveber Nezîfe Xelo Mihemed El-Şêxo û bi dehan endamên saziyên sivîl ên bajêr beşdar bûn.

Merasîm bi deqeyeke rêzgirtinê dest pê kir. Piştre hevserokê Komîteya Çand û Hunerê Mihemed Qebertay axivî û spasiya beşdarên pêşangehê kir û got ku ev gaveke destpêkê ber bi vejandina çanda bajarê Minbicê ve ye.

Di merasîmê de hevseroka Meclisa Rêveber Nezîfe Xelo axivî û kêfxweşiya xwe ji vekirina vê pêşangehê anî ziman û got ku ev gaveke ber bi diyarkirina taybetmendiya dewlemend a çanda herêmê ye û wiha anî ziman: "Ev pêşangeh dê aştiyê vebêje û diyar bike ku çand û huner dikare hezkirinê belav bike û beşdarî xebatên avakirina paşerojê bibe."

Piştî merasîmê dîmeneke stranên folklorîk ên herêmê hate pêşandan û piştre helbesteke der barê efsaneya Gilgamiş ji aliyê helbestvan Hesen El-Ebdullah ve hate gotin. Piştre şanoyeke bi navê "Vegera li welat" hate pêşandan. Di naveroka şanoyê de bang li hemû welatiyên herêmê tê kirin da ku vegerin welatê xwe û beşdarî vejandin û jinûveavakirinê bibin.

Di dawiyê de berpirsyar û welatî di nava tabloyên pêşangehê re geriyan. Tabloyên şêwekariyê yên 8 şêwekarên bajarê Minbicê bûn û tê de rastiya herêmê vedibêjin.

ANHA