Duyemîn Konferansa Navneteweyî ya Polîtîkaya Perwerdeya Tenduristiyê didome

QAMIŞLO

Akademiya Tenduristiyê ya Rojava, Duyemîn Konferansê Siyaseta Perwerdeya Tenduristîyê li navenda Çand û Hunerê ya Aram Tîkran a bajarokê Rimêlan a herêma Dêrikê bi dirûşma "Bi tenduristiya azad ber bi jiyana azad ve" di roja duyemîn de didome. Bi sedan nûnerên saziyên tenduristiyê yên Rojava-Bakurê Sûriyeyê tev li konferansê bûne.

Xebatên roja duyemîn a konferansê bi axaftina endamê komîteya amadekar a konferansê Eledîn Mistefa dest pê kir. Eledîn li ser ku çawa sîstemên desthilatdar di nava dîrokê de sîstema tenduristiyê xistin bin berjewendiyên xwe û mînak li ser sîstema tenduristiyê ji hindek dewletên cîhanê da, dest pê kir.

Paşê hevpeymana pêşxistina perwerdeya tenduristiyê ji aliyê endamên Akademiya Tenduristiyê ya Rojava Dîlber Ebdo û Lemiya Tebkî ve hate xwendin.

Hevpeyman ji du beşan pêk tê. Beşa yekê li ser sîstema perwerdeya tenduristiyê û rola akademiyan di pêşxistina aliyê tenduristiyê de ye û yê duyemîn jî li ser armancên perwerdeyê ye.

Hevpeyman li ser pêngavên pêşxistina tenduristiyê di nava dîrokê de diaxive. Her wiha girêdanên wê bi civaka xwezayî re û ku çawa sîstemên desthilatdar ji xwe re wek bazirganî bi kar tînin û çawaniya avakirina sîstemeke tenduristî dûrî sîstema desthilatdar.

Tê payîn ku nîqaş li ser sîstema tenduristiyê û mekanîzmaya pêşxistina wê li Rojava dê were kirin.

Hêjayî bibîrxistinê ye ku hikumeta PDK`ê ya başûrê Kurdistanê derfet neda bijîşkên îtalyayî ku tev li konferansê bibin.

(bx/ew)

ANHA