Di demeke nêz de wê pêşengehên erebeyan ji kolana Ş.Sarya Ozgur rabin

STÊRA NEBÎ / KOBANÊ

Şaradariya Gel a bajarê Kobanê di 1’ê Gulana 2017’an de dest bi avakirina buroypên kirîn û firotina ereban kir û heta niha pêşangeh neqediyaye diviyabû di 1’ê Gulana 2018’an de radestî xwediyên wan bihatana kirin. Şaredarî, ji ber lehiyên li bajêr û gundan çêbûne karên jê dihatin xwestin zêde bûn û di encamê de rastî gelek astengiyan hat.

Girêdayî mijarê ajansa me ANHA'yê nêrîna hin welatiyên Kolana Şehîd Sarya Ozgur (Kolana 48’an) wergirtin.

Welatiyê bi navê Mistefa Ebdo Abid ê ku di Kolana 48’an de sebze û mêweyan difiroşe, diyar kir ku gelek qezayên tirafîkê rû didin û rewşa çûn û hatinê di kolanê de dijwar bûye.

Ciwanê bi navê Ferhad Sadiq dukandarekî Kolana 48’an ne, diyar kir rojane nêzî 3 qezayên tirafîkê têde rû didin û wiha got: "Di kolanê de hejmara erebeyan  zêde ye û Şaredariyê jî heta niha rawestgehek ji van erebeyan re peyda nekiriye. Di encamê de gelek pirsgirêkên çûn û hatinê derdikevin." Ferhad di dawiya axaftina xwe de hêvî kir ku şaredarî buroyên erebeyan ji ji kolanê rabike.

Firoşkarê mêweyan Ehmed Baqî jî behsa heman mijarê kir û got ku ji ber qelebalixiya çûn û hatina erebeyan gelek pirsgirêk derdikevin û rexneyên xwe li Şaredariyê kirin û bang li Şaredariyê kir ku buroyên erebeyan ji kolanê rabike.

Hevserokê Şaradariya Gel a Kobanê Faris Etê lêborîna xwe ji gel xwest û sedema ku heta niha pêşangeha erebeyan ji kolanê nehatiye rakirin wiha anî ziman: "Li gorî projeyên ku me çêkirine pêwîst e di meha Gulana 2018’an de Kolana 48’an vala bibûya û buroyên hatine avakirin radestî xwediyên wan bihatibana kirin." Etê got ku sedema derengmayîna wan ew e ku proje û karên wan zêde bûne û alavên wan jî kêm in.

Faris Etê got ku dê di demeke nêzîk de buroyan radestî xwediyê wan bikin û kolan ji erebeyan  vala bikin û çûn û hatina di kolanê de birêxistin bikin.

ANHA