Baxçeyên zarokan ên taxa Şêxmeqsûd

ROZANA DADO/HELEB

Di merheleya baxçe de zarok gelek şarezahî û tecrubeyên jiyanî bi dest dixin û ji bo merheleyên pêş jî bingeh e. Her wiha fersendeke ku jinên kedkar barê xwe sivik bikin û bi karê xwe re mijûl bibin.

Piştî rewşa şer ku taxa Şêxmeqsûd tê re derbas bû û ji ber metirsiyên şêniyan ji dûrketina zarokên wan ji xwendinê, Kongreya Star ji bo vekirina 2 baxçeyên zarokan kar û xebat meşand. Kadroya baxçe ji 7 mamosteyên baxçeyê ku li ser şêwazên danûstandina bi zarokan re, fêrkirin û alîkariya derûnî hatin perwerdekirin.

Baxçeya Kulîlkên Pêşerojê beriya salekê li rojavayê taxa Şêxmeqsûd hate vekirin. Tê de 50 zarok hene.

Baxçeya El-Beraêm beriya 3 mehan li taxa El-Eşrefiyê hate vekirin. Tê de 20 zarok hene.

Temenên zarokan li her du baxçeyan di navbera 4-8 saliyê de ne.

Zarok di baxçeyan de zimanên erebî, kurdî û înglîzî dibînin û her wiha şarezahiyên tevgerê bi rêya lîstikan fêr dibin.

Rola baxçeyan di birêxistinkirina jinan de

Endama rêveber a Kongreya Star Nehle Mistefe got ku li ser daxwaza şêniyan piştî serkeftina baxçeyê yekemîn kongreya baxçeyê duyemîn bi navê El-Beraêm li taxa El-Eşrefiyê vekir.

Her wiha Nehla destnîşan kir ku ev her du baxçe di birêxistinkirina jinan de roleke girîng lîst û barên jinan sivik kirin. Piştî ku zarok tev li baxçeyan bûn, jinên kedkar dem dît ku xwe ji qeydên civakê rizgar bikin û her wiha di karê xwe de xwe bi pêş bixin.

Şeza Tirad ji pêkhateya ereb e. Ji zanîngeha perwerdeya baxçeyên zarokan derçûye. Li ser mijara baxçe wiha got: "Armanca baxçeyan tevî bidestxistina şarezahiyên ziman û bîrkarî, perwedekirina zarokan li ser rêgeza hevkariyê ye û her wiha pêşkêşkirina alîkariya derûnî ji zarokan re ye."

Her wiha Şeza Tirad got ku ew zarokan dişopînin û li gorî taybemeniyên wan bi awayekî rast bi wan re danûstandinê dikin. Şeza diyar kir ku wan ji ber rewşa hin zarokan a taybet û ji bo çareserkirina pirsgirkên wan ew şandin aliyên têkildar.

(şx)

ANHA