Zanîngeha Rojava salvegera xwe ya duyemîn pîroz kir

Salvegera duyemîn a vekirina Zanîngeha Rojava bi şahiyekê hate pîrozkirin. Şahî bi beşdarbûna bi sedan kesî hate lidarxistin.

NÛÇE

5 tîrmeh, 2018 13:10

QAMIŞLO

Zanîngeha Rojava di 5'ê Tîrmeha sala 2016'an de li bajarê Qamişlo hate vekirin. Rêveberiya zanîngehê bi boneya 2'yemîn salvegera vebûna zanîngehê şahiyek li dar xist. Bi sedan xwendekar û mamoste beşdarî şahiyê bûn.

Şahiyê bi rêzgirtinê dest pê kir. Paşê axaftina vekirinê hate kirin û salvegera vekirina zanîngehê li hemû xwendekar û gelê Bakurê Sûriyeyê hate pîrozkirin.

Di berdewama şahiyê de mamosteyê zanîngehê yê wêjeya kurdî Salih Heydo axivî û got ku vekirina zanîngehê bi saya keda şehîdan pêk hatiye. Heydo her wiha 2 helbestên bi zimanî kurdî pêşkêş kirin. Paşê endamên Çand û Hunerê ya Mihemed Şêxo stranên xwe pêşkêş kirin. Şahî bi govend û stranan bi dawî bû.

Xwendekarê bi navê Mihemed Ehmed piştî şahiyê ji ajansa me re axivî û hestên xwe bi gotina "Em dizanîn ku Zanîngeha Rojava hêviyên xwendekarên Bakurê Sûriyeyê pêk tîne. Êdî hejmara me xwendekaran sal bi sal zêdetir dibe." anîn ziman.

(hh/ew)

ANHA