Cotkaran Zivistanê zerar dîtin niha dixwazin sûdwergirin

Şêniyên gundewarên Aliyan ên girêdayî bajaroka Girke Legê dest bi çandina sebzeyên demsala Havîne kirine.

CIVAK Û JIYAN

16 hezîran, 2018 09:08

QAMIŞLO/KELSÛMA ALÎ

Şêniyên gundewarên Aliyan ên girêdayî bajaroka Girke Legê zêdetirî xwe li ser çandiniyê xwe xwedî dikin. Îsal jî baran di wextê xwe de nebarî û beşeke mezin ji çandiniya demsala Zivistanê zerar dît. Bi taybet genim û ce zerar dît û bû sedema cotkar ziyanên mezin bibînin.

Di van mehên dawiyê de û bi taybet meha gulanê baran gelekî bariya û cotkar dixwazin ji şilehiya erd sûdwergirin. Niha destpêkirine sebzeyên bejî diçînin.

Cotkar destpêka meha hezîranê destbi çandina werzan dikin. Di werzan de zebeş, tirozî û fincik diçînin. Pêdiviya van sebzeyan bi avdaniyê nîne û li bazarên herêmî têne firotin. Her wiha cotkar fêde ji dendikên zebeş û qawînan digrin.

Cotkarê bi navê Ehmed Tehlo yê ji gundê Çîlka anî ziman ku wan ji ber çandiniya demsala Zivistanê gelek zerar dîtin û niha dixwazin ji sebzeyên Havînê sûdwergirin.

Gazinca Ehmed Tehlo mîna cotkarên dîtir ji bihabûna çandinî û reşandina dendikan heye lê belê ji bo debara jiyana xwe bikin, dîsa jî sebzeyên bejî diçînin.

(np)

ANHA