Ciwanên Serêkaniyê xebatên salekê nirxandin

HESEKÊ

Di bin dirûşmeya ″Welat welatê me ye tolhildan soza me ye″ Yekîtiya Ciwanên Rojava (YCR) bi tevlîbûna Ciwanên navçeya Zirganê civîna xwe ya salekê li dar xist.

Di civînê de bi sedan ciwan, mamoste, xwendakarên peymangeha Şehîd Elî Şêx Dawûd, her wiha endamên hemû saziyên sivîl ên navçeyên Serêkaniyê û Zirganê amade bûn.

Civîn bi deqeyek rêzgirtin dest pê kir. Piştire li ser navê Tevgera Civaka Demokratîk (TEV-DEM) Luqman Îsa wiha axivî, ″Wekî Rêberê gelê Kurd Abdullah Ocalan gotiye ″Me bi ciwanan dest pê kir û em ê bi ciwanan bi ser bikevin. Vêtnamê, Kûba, Engola û li Filistînê hemûyan bi rihê ciwanan dest pê kirine.″

Luqman diyar kir ku di sala 70′î de Tevgera Azadiyê bi 3′ê ciwanan dest pê kir û wiha domand, ″Îro li bajarê Serêkaniyê bajarê berxwedanê, hejmareke mezin a ciwanan di civînê de amade bûn e. Ciwanên Rojava ev 7 salan xwe bi rêxistin kirine û gelek serkeftin bi dest xistin.″

Piştre rapora salekê ya ciwanên Rojava ji aliyê rêveberiya Peymangeha Şehîd Elî Şêx dawûd, Selwa Salif ve hate xwendin û nirxandin.

Piştre li nêrîn û pêşînarên ciwanan derbarê plansaziya xebatên demên pêş de, hatin  guhdarkirin.

Civîn bi dirûşmeya ″Bijî Serok Apo″ bi dawî bû.

(sx/mm)

ANHA