Şehîdên Qereçoxê li cihê şehadetbûna wan hatin bibîranîn

QAMIŞLO

Balafirên şer ên dewleta Tirk a dagirker di 25`ê Nîsana 2017`an de Çiyayê Qereçoxê yê girêdayî herêma Dêrikê bombebaran kir. Di encamê de, endamên raghandina YPG`ê di nav de 18 şervanênYPG û YPJ`ê şehîd bûn.

Ji bo bîranîna cangoriyên Qereçoxê, îro bi hezaran ji pêkhateyên herêma Cizîrê û Şengalê berê xwe dane Çiyayê Qereçoxê û êrîşên dagirkeriya Tirk li ser Qereçoxê û tevahiya Bakurê Sûriyê şermezar kirin.

Merasîm bi toraneke leşkerî ji aliyê şervanên YPG, YPJ û Hêzên Erka Xweparastinê ve hate destpêkirin. Paşê, ji fermandarên YPJ`ê Zeyneb Efrîn axivî û wiha pê de çû,ʺÊrîşa li dijî Qereçox li dijî ruhê biratiya gelan li Bakurê Sûriyê û li dijî projeya çareseriyê ku pêkhateyên Bakurê Sûriyê pêşkeş kir.ʺ

Zeyneb da zanîn ku dewleta Tirk ji bo zextê li ser çeteyên DAIŞ`ê li bajarê Reqayê ku ji aliyê şervanên QSD`ê ve hatibûn dorpêçkirin, êrîşî Qereçoxê kir.

Zeyneb tekez kir ku berxwedana ku li dijî DAIŞ`ê hate destpêkirin, wê bi bersivdayîna êrîşên dewleta Tirk li ser tevahiya Rojava û Bakurê Sûriyê tacîdar be.  Zeyneb Efrînî got ku armanca dewleta Tirk têkbirina şoreşa Rojava ye û şikandina îradeya gelan e.

Zeyneb di dawiya axaftina xwe de, soza şopandina rêya şehîdan nû kir.

Bi navê Kongreya Star jî Perwîn Mihemed Emîn axivî û tekez kir  ku wê gelên Bakurê Sûriyê destkeftiyên ku bi saya fikren Netewa Demokratîk bidest xistine biparêze.

Herwiha bi navê Meclîsa Şengalê li Ewropa, Meclîsa Malbatên Şehîdan a herêma Dêrikê û Kurdistaniyên li Ewropayê axaftin hatin kirin û êrîşên dagirkeriya Tirk hatin şermezarkirin û ji civaka navneteweyî hate xwestin ku sînorekî ji kiryarên dewleta Tirk li Sûriyê deyîne.

Piştî merasîman, gel tevî hêzên leşkerî berê xwe dane Goristana Ş.Xebat Dêrik.

(kc)

ANHA