10 zarokên di Olîmpiyada Artîmatîk de bi serketin hatin xelatkirin

10 Zarokên ku beşdarî pêşbirka Olîmpiyada Artîmatîk bûbûn, ji aliyê Desteya Çandê ya Kantona Cizîrê bi hevkariya Super Activity li navenda Çand û Hunerê ya Mihemed Şêxo ya bajarê Qamişlo hatin xelatkirin.

32 zarok tev li pêşbirkê bûbûn, ji wan 10 zarok bi ser ketin; 2 ji wan gihîştin asta cîhanî (Rodî Welîd Çelebî û Eyen Welîd Çelebî) 8 zarok jî li ser asta Bakur û Rojhilatê Sûriyeyê astên yekemîn heya 8ˊemîn bûn (Selah Idrîs Elî, Sîmav Mêrdas Fatmê, Xebat Sebrî Mûsilmanî, Jiyan Xelîl Hec Mûslêm, Mihemed Ebdulselam Eyûb, Aram Kawa Hec Mûslêm, Ela Eldîn El Hesenî, Ayenda Welîd Çelebî). Ew zarok hatin xelatkirin.

Endamê Rêveberiya Desteya Çandê ya kantona Cizîrê Ebdulmecîd Helef axivî û got:"Bi xêrhatina hemûyan dikim, îro em li vir kom bûne ji ber ku zarok siberoja vî welatî ne."

Piştre Rêveberê Navenda Super Activity Dr.Semîra El Zeyn axivî û got: "Beşdarên hêja, gelê me yê hêja, lehengên me yên biçûk, em bejna xwe li hember van zarokên afirîner ku di vê pêşbirkê de bi ser ketine ditewînin. Van zarokên serketî ji cîhanê re îsbat kirine ku siberojek geştir li pêş me heye."

Piştre mamoste Dunya Mehmûd axivî got: "Di destpêke de ez spasiya Desteya Çandê ya Kantona Cizirê dikim, ku destek da zarokan ji bo beşdarî vê pêşbirkê bibin. Îro derfet da me ku zarokên me bên xuyakirin. Ez gelek kêfxweş im ku piştî keda ku me da, îro kombûna me ji bo xelatkirina zarokên me ne."

Dûre koma stranan a Sema ya bajarê Dirbêsiyê stran gotin û dibistana Şano şanoyek bi serenava "Dibistan El Haris" pêşan da.

Dûre zarokan lîstika Robik lîstin, pirsên jimaryariya hişî ji zarokan re bi zimanê Kurdî, Erebî û Îngilîzî der barê bîrkarî de hatin kirin.

Ji bo zarokên temen biçûk jî pirsên bi zimanê Kurdî û Erebî hatin kirin.

Aliyên berpirsê olîmpiyadê spasnameyek radestî Desteya Çandê ya kantona Cizîrê kir.

Di dawiyê de spasname û xelat li ser zarokan hatin belavkirin.

(fk/şx)

ANHA