ˋMezhebtiyê red bikinˊ

Li navenda Çand û Hunerê ya Serdem a bajarê Hesekê civîneke girseyî bi beşdariya Şêx Murşid El Xiznewî li dar ket. Di civînê de geşedanên li Sûriyeyê û bandorên wan li ser Herêma Bakur û Rojhilatê Sûriyeyê hatin nîqaşkirin.

Di civînê de şandeyeke Rêveberiya Xweseriya Demokratîk a kantona Cizîrê, Meclisa Rûspiyan, serokeşîr, oldar û bi dehan şêniyên bajêr beşdar bûn.

JIYANA HEVBEŞ Û ROLA OLÊ DI WÊ YEKÊ DE

Di serî de, Şêx Murşid li ser nirxên olî yên Qurana Pîroz ên der barê rêzgirtina ji hevdu re û jiyana hevbeş û aştiyane di navbera gel û olan de, axivî û got: "Pêwist e ol bibe sedema yekbûnê, ne nakokiyan. Pêwist e em ji nakokiyên olî û nijadî yên ku mozaîka civakî têk dibin, bi dûr bikevin."

ˋASTENGIYÊN DERVE Û HEWLDANÊN DESTWERDANÊˊ

Şêx Murşid der barê zehmetiyên li dijî herêmê û destwerdanên derve de, diyar kir ku hêzên herêmî di serî de dewleta Tirk a dagirker roleke nerênî dilîzin û aramiya Sûriyeyî têk dibin û got: "Ev destwerdan bi armanca derxistina fîtneyan di nav gelê Sûriyeyê de ne. Li hemberî wê jî pêwistî bi helwesteke xurt a hemû pêkhateyên herêmê û pêşxistina jiyana hevbeş û yekrêziyê heye."

ˋGIRÎNGIYA YEKITIYA NÎŞTIMANÎˊ

Li ser girîngiya yekrêziyê Şêx Murşid banga hevgirtina bi dirûşma "biratiya gelan" kir û girîngî bi derbaskirina nakokiyan û pêşxistina biratiyê da û got: "Pêwist e Rêveberiya Xweser a ku hemû pêkhateyan di bin siya xwe de dihewîne bibe çareseriya guncaw a misogerkirina mafên hemiyan."

Şêx Murşid banga parastina hevsengiya di navbera mafên hemû pêkhateyan de û pêşxistina wekhevî û edaleta civakî, kir.

ˋROLA RÊVEBERIYA XWESER Û PIŞTGIRIYA QSD'Êˊ

Şêx Murşid ji gelên herêmê re got destekê bidin Rêveberiya Xweser û Hêzên Sûriya Demokratîk ên ku nûnertiya tevahî pêkhateyan dikin û got: "Pêwist e her kes yekitiya nîştimanî ji bo pêşeroja Sûriyeya pirreng ku tê de rêz ji hemû ol û neteweyan re were girtin, xurt bike."

AMÛDÊ

Di heman çarçoveyê de, Meclisa Malbatên Şehîdan a bajarê Amûdê civîneke girseyî li navenda Partiya Yekitiya Demokratîk (PYD) ya bajêr li dar xist.

Di civînê de girîngî bi hevgirtin û berxwedanê li hemberî êrişên dewleta Tirk a dagirker û çeteyên wê, hat dayîn.

(mh/fr)

ANHA

Hesekê