YRAˊyê rojnamevan xelat kirin

Bi boneya 126ˊemîn a Roja Rojnamevaniya Kurdî, YRAˊyê şahiyek li dar xist û xelat li rojnamevanên heqîqet û rastiya li Bakur û Rojhilatê Sûriyeyê ji cîhanê re veguhastine belav kirin.

Merasîma xelatkirinê li Xwaringeha Merry Land a li Qamişloyê bi beşdariya nûnerên ji Rêveberiya Xweseriya Demokratîk û bi dehan rojnamevan hat lidarxistin.

Di şahiyê de hevserokê YRAˊyê Dilyar Cizîrî axivî û Roja Rojnamevaniya Kurdî li tevahî rojnamevanan pîroz kir.

Cizîrê revandina rojnamevan û edîtorê Rojnewsˊê Silêman Ehmed şermezar kir û bang li aliyên têkildarî û rêxistinên parastina rojnamevanan dikin kir ku ji bêdengiya xwe ya li dijî rojnamevanan derkevin.

Li aliyekî din jî endamê YRAˊyê Refîq Îbrahîm axivî û got: "Encamên Şoreşa Bakur û Rojhilatê Sûriyeyê ji bo gelên herêmê bi giştî baş bûn û ji bo ragihandinê jî bi taybet. Îro zemîneke baş a ragihandinê çêbûye. Em serketina pergala biratiya gelan, ruxmî tevahî êriş û planan, silav dikin."

Îbrahîm bang li tevahî rojnamevanan kir ku têkoşîna xwe ji bo pêkanîna azadî, edalet û demokrasiyê bilind bikin û wiha bi dawî kir: "Em bi hêvî ne Roja Rojnamevaniya Kurdî bibe gaveke nû ber bi ragihandina pîşeyî ve û em layiqî baweriya hevalên me yên şehîd ji me re hiştine, bin."

Dûre hevserokê Daîreya Ragihandinê ya Rêveberiya Xweser Ciwan Mela Îbrahîm axivî û behsa rola rojnamevanên li Bakur û Rojhilatê Sûriyeyê der barê veguhastina rastiya gelên herêmê de kir û got: "Yên ku dengê Şoreşa 19ˊê Tîrmehê vedaye û ji cîhanê re aşkera kiriye, fedakariyên rojnamevanên li Bakur û Rojhilatê Sûriyeyê bûn. Çawa Şoreşa Bakur û Rojhilatê Sûriyeyê, şoreşa siyasî, leşkerî û civakî ye, şoreşa ragihandinê ye jî."

Piştre koma Yekpar a stranan, hunermend Bêrîvan Botan û koma Cûdî ya stranan stran pêşkêş kirin.

Dûre rojnamevan hatin xelatkirin; pêşkêvan radyoya Star FM Rîham Ebdullah, pêşkêşvanê Kanla Rojava TV Şerîf Mihemed, edîtora Rojnameya Ronahî Bêrîvan Xelîl xelatên xebat û domdariya di aliyê rojnamegeriyê wergirtin, nûçegihana kanala Ronahî TV Ciwana Cuma, nûçegahiana kanala JIN TV Delîla Egîd xelata  werekiyê wergirtin, rojnamevan û edîtorê Rojnewsˊê Silêman Ehmed ku ji 181 rojan ve ji hêla PDKˊê hatiye revandin xelata Kurdistanî wergirt, xelata cîhanî jî nivîskar û rojnamevan Îlham El Melîcî wergirt. Nûçegihana JIN TV Loristana Derwêş jî xelata keda û sipasiyê wergirt.

(fr)