Xelkê Qamişlo sersaxî da malbatên şehîd Ciwan Elî û Aya Mihemed

Xelkê Qamişlo û gundewarên girêdayî wê sersaxî da her du malbatên şehîdan Ciwan Elî û Aya Mihemed. Konê sersaxiyê li pêş mala Ciwan Elî li taxa Curnik a Qamişloyê hate vedan.

Her du welatî Ciwan û Aya di êrişên dewleta Tirk a dagirker li dijî Qamişloyê de şehîd bûbûn.

Li bin konê sersaxiyê wêneyên her du şehîdan, wêneyên Rêber Abdullah Ocalan û ala Meclisa Malbatên Şehîdan hatin daliqandin.

Di merasîmê de li ser navê koçberên Efrînê endama Koordînasyona Kongra Star Hêvî Silêman axivî û got: "Divê cîhan tevahî bizane ku pêkhateyên herêmê li dora rêveberî, destkeftî û nirxên şehîdan civiyane. Xwîna Kurd, Suryan û Ereban di oxira pêkanîna azadiya gelên herêmê ji Efrîn heta bi Qamişloyê de tev li hev bûye. Dê gelê me li hember êrişên li dijî Rêveberiya Xweser û destkeftiyên gelên herêmê berxwedaniyê bike."

Li aliyekî din endamê Partiya Yekitiya Demokratîk (PYD) Kêfo Osman axivî û wiha got: "Hatina me ya vir nûkirina soza me ji bo şehîdan e ku em li ser şopa wan in."

Piştî axaftin bi dawî bûn, diruşmên silavkirina berxwedana şehîdan hatin berzkirin.

Merasîm bi xwendina wesîqeyên her du şehîdan û radestkirina ji malbatên wan re bi dawî bû.

(fr)

ANHA