Xelkê li Şehbayê sersaxî da malbata şehîd Azad Efrîn

Şêniyên Şehbayê û koçberên Efrînê sersaxî da malbata gerîlayê HPG'ê Azad Efrîn û soza şopandina rêya şehîdan heta pêkanîna serkeftinê û azadiya fîzîkî ya Rêber Abdullah Ocalan da.

ROJANE

19 îlon, 2024 18:42

ŞEHBA

Meclisa Malbatên Şehîdan a kantona Efrîn û Şehbayê ji bo gerîlayê Hêzên Parastina Gel (HPG) şehîd Azad Efrîn (Rizgar Elî Hisên) li gundê Babinis ê Şehbayê merasîmeke xiyabî li dar xist. Şehîd Azad di 7'ê Tebaxa par de li herêma Zapê şehîd bû.

Di merasîmê de şêniyên Şehbayê û koçberên Efrîna dagirkirî, nûnerên deste û meclisên kantonê beşdar bûn. Di serî de endama Meclisa Malbatên Şehîdan a kantonê Şaziye Mihemed sersaxî da malbata şehîd û soza şopandina rêya şehîdan heta pêkanîna azadiya gel û azadiya fîzîkî ya Rêber Abdullah Ocalan nû kir.

Bi navê Rêveberiya Xweser a kantonê Mihemed Şêx Qenber di şexsa şehîd Azad de tevahî şehîdên azadiyê bi bîr anîn û got: "Kes nikare îradeya me têk bibe. Em ê heta dawiyê bi fikrên Rêber Abdullah Ocalan li ber xwe bidin."

Di dawiya merasîmê de wesîqeya şehadetê hat xwendin û radestî malbatê hat kirin.

(mh)

ANHA