Tirkiye li Şamê radar bi cih kir: Îsraîl nerehet e

Navenda Lêkolîn û Perwerdehiyê ya Alma (israel-alma) raporek taybet têkildarî bicihkirina radara HTRS-100 a Tirkiye li balafirgeha Şamê û nerehetiyên ku ev yek daye Îsraîlê li ser malpera xwe weşand.

Di raporê de hatiye diyarkirin ku bicihkirina pergala radara HTRS-100 ji aliyê Tirkiyeyê ve li Balafirgeha Navneteweyî ya Şamê, li Îsraîlê di der barê dahatûya operasyonên hewayî yên li herêmê de fikaran derxistiye holê.

Li gorî raporê, taybetmendiya teknîkî yên pergalê dikare tevgerên hewayî yên Îsraîlê li Sûriye û derdora wî bişopîne.

Pergala radarê ya HTRS-100 ji hêla şîrketa pîşesaziya parastinê ya Tirkiyeyê (ASELSAN) ve hatî pêşve xistin. Ji hêla Desteya Hewayî ya Sivîl a Sûriyeyê û Balyozê Tirkiyeyê li Şamê Nuh Yilmaz ve bi fermî wekî modernîzasyonek binesaziya sivîl bi armanca zêdekirina ewlehiya firînê û baştirkirina rêveberiya trafîka hewayî hate wesifandin.

Lê berovajî vê di raporê de hat gotin ku hêza teknîkî ya vê pergalê ne tenê bi karanîna sivîlan ve sînordar e.

Di raporê de hatiye destnîşan kirin ku radara HTRS-100 dikare wêneyekî hewayî yê sêalî di navbera 150 û 185 kîlometreyan de bigire. Ev herêma parastinê Şam, her wiha piraniya Lubnanê û beşek ji qada hewayî ya bakurê Îsraîlê dihewîne.

Di dewama raporê de hate diyarkirin ku radar xwedî taybetmendiyên ku wê ji bo armancên leşkerî û îstîxbaratî guncan dike ye, bi saya pergala wê ya Dost-an-Dijmin (IFF) û binesaziya zêde ku dihêle ew di şert û mercên şerê elektronîk de jî bixebite.

Li gorî raporê, ev pergal dikare torên radarên Rûsya û Îranê yên ku vê dawiyê xirabûne bigire an jî wan temam bike.

Di raporê de îşaret bi nerehetiyê Tel Avîvê ya li hemberî vê yekê hate kirin û hate diyarkirin: “Li Tel Avîvê, tê bawerkirin ku radara ku ji hêla Tirkiyeyê ve li Şamê hatiye bicihkirin hêmanek nû ye ku dê bihêle ku Îsraîl operasyonên hewayî yên li herêmê ji nêz ve bişopîne û potansiyel azadiya tevgera xwe sînordar bike.”