Stasyonên ji ber topbaranê rawestiyabûn hatin sererastkirin

4 stasyonên ava vexwarinê yên ji ber êrişên hêzên hikumeta Şamê û çekdarên "Dîfa Wetenî" ji xizmetê derketibûn, hatin sererastkirin û careke din ketin xizmetê.

ROJANE

18 tebax, 2024 13:54

DÊRAZOR

Hêzên hikumeta Şamê û çekdarên "Dîfa Wetenî" ji 7`ê Tebaxê heta 12`ê Tebaxê rojhilatê Dêrazorê tobparan kiribûn. Di encama topbaranê de 15 sivîl şehîd bûn û 24 jî birîndar bûn.Her wiha zirar li mal û milkên şêniyan hat.

Stasyona li Sebxa ya bajarê Basîra ya ku avê dide 15 hezar kesî, stasyona El Omer a li bajarokê Zîban a avê ji 3 hezar kesî re peyda dike, stasyona Hewaêc Ziyab ya li bajarê Kesrayê avê ku ji 12 hezar kesî re peyda dike û stasyona Ebû Hemam ku avê ji 4 hezar kesî re peyda dike hatin hedefkirin û ji xizmetê derketibûn.

Piştî ku ewlehî vegerî gund û bajarokên kantona Dêrazorê Saziya Avê ya Kantona Dêrazorê dest bi sererastkirina her 4 stasyonan kir.

Gerînendeyê Saziya Avê Fewaz El Itêş destnîşan kir ku di encama topbaranê de, zirar li heykel, veguhêzên kehrebeyê û boriyên avê hatine.

El Itêş da zanîn ku saziyê tevahî stasyon sererast kirine û dest bi xebitandinê kirine.

Li kantona Dêrazorê 80 stasyonên ava vexwarinê hene. Hinek jê avê ji çemê Firatê û hinek din jî ji kanalên avdanê peyda dike.

(şx)

ANHA