Şêniyên Qamişlo serdana konê taziyê yê şehîdên Dêrikê kir

Merasîma sersaxiyê ya herdu şehîdan ji aliyê Meclisa Malbatên Şehîdan a Dêrikê ve li navenda Şehîd Bawer a ciwanên şoreşger hat lidarxistin. Tevî şêniyên bajêr, şêniyên navçeyên Girkê Legê, Çilaxa û Koçerat jî beşdarî merasîmê bûn.

Merasîmê bi rêzgirtinê dest pê kir. Piştre endama Meclisa Malbatên Sehîdan a Girkê Legê Hezna Temo axaftinek kir. Hezna sersaxî da malbatên şehîdan û ji ber fedkariyên ku di oxira parastina şoreşê de nîşan didin, gelên Bakur û Rojhilatê Sûriyeyê silav kir.

Endama Rêveberiya Kongra Star Fatima Hecî jî axivî û bal kişand ser israra gelê Bakur û Rojhilatê Sûriyeyê ya berdewamkirina têkoşîna azadî û aştiyê û got ku ew ê tola şehîdan hilînin.

Di merasîmê de zarokê bi navê Ehmed Şahîn ê di bombebarana dewleta Tirk a dagirker li dijî Dêrikê de birîndar bûye jî axivî û bi van gotinan xîtabî dijminên gelê herêmê kir: “Ey dijmin, êrişên we me natirsînin. Em ê mezin bibin, şer bikin û tola şehîdên xwe rakin.”

Hevserokê Meclisa Navçeya Girkê Legê Fûad Seîd jî bal kişand ser cihê şehîdan ê pîroz di dilê gelên Bakur û Rojhilatê Sûriyeyê.

Li ser navê malbata şehîd Şiblî, Seîd Şiblî, li ser navê malbata şehîd Ciwan jî Şêrzad Mihemed axivîn û soza berdewamkirina rêya şehîdan da.

Di dawiya merasîmê de wesîqeyên şehîdan di nava dirûşmeyên dilsoziya bi şehîdan re hatin xwendin û radestî malbatên wan hatin kirin.

(c)

ANHA