Cenazeyê şervanê QSD`ê Lewend Til Hemîs hat oxirkirin

Bi sedan şêniyên navçeya Til Hemîs a girêdayî kantona Qamişlo û gundên wê, endamên saziyên sivîl û meclisên navçeyê beşdarî merasîma oxirkirina şervanê Hêzên Sûriya Demokratîk (QSD) Lewend Til Hemîs (Faris Hamid Sefûk) bûn.

Şervanê QSD`ê Lewend Til Hemîs 29`ê Cotmehê li Dêrazorê şehîd bibû.

Merasîm li pakrewangeha Til Hemîsê hat lidarxistin û bi rêzgirtinê dest pê kir.

Di merasîmê de şervanê QSD`ê Aras Til Hemîs axivî, sersaxî ji malbata şehîd re xwest û got: “Em ji malbata şehîd re dibêjin ku xwîna şehîdan li erdê namîne. Em ê têkoşîna xwe ji bo pêkanîna armancên wan bilind bikin. Hemû şervanên QSD`ê zarokên we ne, em ê soz didin ku em ê rêwîtiya şehîd Lewend bidomînin.”

Endamê Meclisa Malbatên Şehîdan a navçeyê Hemza Salih jî di axaftina xwe de bal kişand ser girîngiya yekîtî û hevgirtina li hember êrişên dewleta Tirk a dagirker ên dijî herêmê.

Bi navê saziya olî ya Til Hemîsê jî Mûtez El Enter axivî û bal kişand ser cihê şehîdan ê pîroz di ola Îslamê de.

Piştî axaftina bi dawî bûn, wesîqeya şehîd hat xwendin. Piştre hevalên şehîd Lewend cenazeyê wî rakirin ser milan û di nava dirûşmeyên “Şehîd Namirin” de spartin axê.

(c)

ANHA