Şêniyên kantona Firatê şehîd Zinar Kobanê oxir kir

Bi sedan şêniyên kantona Firatê şervanê Hêzên Sûriyeyê Demokratîk (QSD) şehîd Zinar Kobanê (Şêxo Cimo) ê ku di 18`ê Hezîrana 2025`an li Qerarîşkê yê Kobanê şehîd bûbû de, bi merasîmeke biheybet li Pakrewangeha Şehîd Dicle spart axê.

Merasîm bi deqeyek rêzgirtinê dest pê kir. Dûre hevseroka Partiya Yekitiya Demokratîk (PYD) a Kantona Firatê Bêrîvan Îsmaîl sersaxî ji malbata şehîd Zinar Kobanê re xweset û bejna xwe li hember darbestê şehîd tewand.

Bêrîvan Îsmaîl anî ziman ku şehîd Zinar bê dudilî û heta kêliya dawiyê têkoşîn dikir û got: "Şehîd Zinar Kobanê her tim li kêlek hevalên xwe di nava têkoşîn û berxwedanê de bû. Ji bo ku axa xwe biparêzin şervanên me heta kêliya dawî têkoşîn dikin. Em bi şehadeta şehîdên xwe serbilind in. Em soz didin şehîdên xwe ku em ê şopdarê rêya wan bin."

Endamê Meclisa Leşkerî ya bajarê Kobanê Mihemed Oso diyar kir ku ew ê şopdarê şehîd Zinar Kobanê bin, xewn û xeyalên şehîdên xwe pêk bînin û got: "Em soza xwe ji bo giyanê şehîdên xwe nû dikin, ku em ê heta dawiyê li hemberî dijmin tê bikoşin û serkeftinê misoger bikin."

Piştî axaftinan wesîqeya şehîd hate xwendin û radestî malbata wî hate kirin

Bi diruşmeyên "Şehîd Namirin" şehîd Zinar Kobanê hat oxirkirin.

(sş/fr)

ANHA