Şêniyên Helebê şehîd Xemgîn Heleb oxir kir
Di peyamên ku li merasîma oxirkirina şehîd Xemgîn Heleb hatine xwendin de, hat destnîşankirin ku şehadeta şehîd Xemgîn wekî derbeyekê li dijî siyasetên pergalên zordest bû. Ew pergalên ku hewl didin projeya biratiya gelan a Rêber Abdullah Ocalan têk bibin.
Şêniyên taxên Şêxmeqsûd û Helebê û şervanên Yekîneyên Parasatina Gel (YPG) û Yekîneyên Parasatina Jin (YPJ) şervanê Hêzên Rizgariya Efrînê (HRE) şehîd Xemgîn Heleb (Xelef El Dahir) oxir kir. Şehîd Xemgîn di 7'ê vê Cotmehê de di êrişên dewleta Tirk a dagirker de şehîd bû.
Karwanê şêniyan ji pêşiya nexweşxaneya şehîd Xalid Fecir a rojavayê taxa Şêxmeqsûd ber bi goristana şehîdên Berxwedana Taxên Şêxmeqsûd û Eşrefiyê ya li herêma Şiqeyêf ve, bi rê ket.
Piştre endamê Meclisa Leşkerî ya Helebê Zagros Heleb diyar kir ku pergalên zordest hewl didin di nava pêkhateyên Sûriyeyê de cudahiyê çêbikin û got: "Lê belê projeya Rêber Abdullah Ocalan hemû pêkhate di nav xwe de bi hezkirin û wekhevî hewandin."
Endama Meclisa Malbatên Şehîdan Ayşe Hiso wiha axivî: "Rêbertî bi fikrên xwe hemû pêkhate kirin yek. Nîşana vê yekê jî şehadeta şehîd Xemgîn ê ji qebîleya Şumer a pêkhateya Ereb e. Şehîd Xemgîn bi şehadeta xwe derbeyek li siyasetên pergalên zordest ên ku hewl didin gelan ji hev dûr bixin, da."
Pismamê şehîd Xemgîn, Îbrahîm El Şumerî got: "Têkoşîna me ji şehîd Ezîz Ereb dest pê kir û gihîşt Xelûf Mihemed û em ê heta pêkanîna azadiya fîzîkî ya Rêber Abdullah Ocalan wê têkoşînê bidomînin."
Şehîd bi tilîliyên dayikan hat oxirkirin.
Çaverê ye ku sibe merasîma sersaxiyê ji aliyê Meclisa Malbatên Şehîdan ve li qada 7 şehîdan a rojhilatê taxa Şêxmeqsûd saet di 11:00'an de were lidarxistin. Tê de partî, sazî, komîn, meclis û hêzên leşkerî dê beşdar bibin.
(mh)
ANHA
