Şehîd Egîd Tolhildan bi merasîmeke girseyî hat oxirkirin

Şervanê QSD’ê Egîd Tolhildan (Silêman Îbrahîm) ê ku 8’ê Kanûnê (2025) şehîd bûbû, îro bi merasîmekê li Pakrewangeha Şehîd Xebat a bajarê Dêrikê hat oxirkirin. Bi sedan şêniyên Dêrik, Girkê Legê û Çilaxa beşdarî merasîmê bûn.

Merasîm bi deqeyeke rêzgirtin dest pê kir. Piştre endama Meclisa Malbatên Şehîdan a Dêrikê Sûad Çawîş axivî û anî ziman ku parastina destkeftiyên şoreşê erkeke dikeve ser milê her kesî.

Sûadê banga şopandina xeta şehîdan ta pêkanîna armancên wan kir û got xwedîderketina li xeta şehîdan mîsogeriya bidestxistina azadî û parastina rûmetê ye.

Endamê Meclisa Kongreya Îslama Demokratîk a Dêrikê Ebdulselam Mihemed jî axivî û ev tişt anî ser ziman: "Şehîd meşaleya ku rêya me ronî dikin. Kombûna me li vir a oxirkirina îfadeya serfiraziya bi fedakariyên şehîdan e.”

Ebduselam Mihemed diyar kir ku giyanê şehîd wê di wijdanê civakê de zindî bimîne û dê civakê bi erka wê ya parastina welat bi bîr bîne.

Ji fermandarên QSD’ê Seîd Koçer jî di axaftina xwe de pêvajoya piştî rûxandina rejîma Baasê nirxand û destnîşan kir ku hewldanên hedefkirina herêmê hebûn, lê QSD’ê hewldan têk birin.

Koçer bal kişand ser berxwedana Bendava Tişrînê jî û wekî xaleke girîng ku planên dagirkirinê vala derxistin, nirxand.

Axaftvanan îşaret pêk kir ku şehîd Egîd Tolhildan roleke girîng di berxwedana Bendava Tişrînê de lîst û bi lehengî li hemberî hêzên dijber şer kir ta gihaşt asta şehadetê.

Di axaftinan de soza domandina rêya şehîdan hate dayîn. Piştre nasnameya şehîd Egîd hat xwendin û radestî malbata wî hat kirin. Cenazeyê şehîd bi tilîliyên dayikan spartin axê.

Sersaxî dê sibe li gundê Girkê Dijwêr ê herêma Koçeratê ya Dêrikê were qebûlkirin.

(b)

ANHA