Şehîd Ebdulqadir Îbrahîm hat oxirkirin

Şervanê Hêzên Komandos ên QSD′ê Ebdulqadir Îbrahîm 9′ê kanûnê li Dêrazorê şehîd bû. Endamên meclis, saziyên sivîl, hevreyên şehîd jî di nav de, bi sedan şêniyên Qamişloyê cenazeyê şehîd Ebdulqadir Îbrahîm li Pakrwangeha Şehîd Delîl Saroxan spart axê.

Girse cenazeyê şehîd ji taxa Enteriyê wergirt û bi dirûşmên dilsoziya bi şehîdan re ber bi pakrawangehê ve bi rê ket.

Li pakrwangehê, endama Meclisa Malbatên Şehîdan Fatma El Casim sersaxî da malbata şehîda û hevgirtina pêkhateyan a li hemberî komployan silav kir. Fatma El Casim got: "Bi saya keda pêkhateyhan û hevgirtina wan a ku xwe dispêre felsefeya Rêber Abdullah Ocalan em bi azadî û rûmet dijîn.′′

Fatma El Casim soza parastina destkeftiyên şoreşê da û got: "Dê ji vî gelê bi sedan kesên mîna şehîd Ebdulqadir çêbibin û dê rêwîtiya wî bişopînin.′′

Di merasîmê de endamê Kongreya Îslama Demokratîk Silêman Elî bal kişand ser hevgirtina gelên Bakur û Rojhilatê Sûriyeyê û wiha got: "Ev gel zulmê qebûl nake û dê ji heta dawiyê li ber xwe bide. Em ê nehêlin tu kes zerarê bide projeya me ya demokratîk. Em ê heta serkeftin û azadiyê xeta şehîdan bişopînin."

Ji fermandarên Meclisa Leşkerî ya Qamişloyê Nezîr Sofî soz da ku dê li ser xeta şehîdan bimeşin ta armancên wan ên azadî û serkeftinê bi cih bînin.

Piştre wesîqeya şehîd hat xwendin û radestî malbata wî hat kirin. Cenazeyê şehîd bi tilîliyên dayikan û dirûşmên "Şehîd namirin" li Pakrwangeha Şehîd Delîl Saroxan hat veşartin.

(bb)

ANHA