Şehîd Bêrîtan Navdar li Amûdê hat oxirkirin

Bi sedan şêniyên navçeya Amûdê ya kantona Cizîrê cenazeyê şervana YPJ’ê Bêrîtan Navdar (Ronahî Rodî Îbrahîm) bi merasîmekê li Pakrawangeha Şehîd Îsmaîl a li navçeyê spart axê. Şervana YPJ’ê Bêrîtan Navdar 22’yê Çileyê di encama qezayeke giran de li bajarê Tebqayê şehîd bûbû.

Endamên saziyên sivîl, perwerde, Hêzên Ewlelkariya Hundirîn, şervanên YPJ’ê û endamên Kongra Star beşdarî merasîmê bûn.

Girseyê cenaze ji avahiya Meclisa Malbatên Şehîdan a navçeyê wergirt û bi dirûşmên "Şehîd namirin" û "Bi can bi xwîn em bi te re ne ey şehîd" berê xwe da Pakrawangeha Şehîd Îsmaîl.

Rêvebera Meclisa Malbatên Şehîdan Cewhir Osman sersaxî ji malbata şehîd re xwest û li dijî sûcên dewleta Tirk a dagirker banga mezinkirina têkoşînê kir. Cewahir Osman soza şopandina xeta şehîdan da.

Endamê Meclisa Leşkerî ya Amûdê Berxwedan Çiya qala têkoşîna şehîd Bêrîtan kir û got, dê xeta şehîdan temam bikin ta hêviyên wan ên serkeftin û azadiyê pêk bînin.

Piştre wesîqeya şehîd hat xwendin û radestî malbata wê hat kirin. Xalê şehîd Bêrîtan Ekrem Îbrahîm axivî û got, ew bi şehadeta Bêrîtan serbilind in.

Şehîd bi dirûşma "Şehîd namirin" li Pakrawangeha Şehîd Îsamîl hat veşartin.

(bb)

ANHA