Şaredariya Til Temirê bi şêniyan re xebatên xwe nirxandin

Şaredariya Gel Til Temirê ya kantona Cizîrê civîna xwe ya 6 mehan li dar xist. Civîn li Kafeteryaya Kanîr a li bajêr pêk hat. Nûnerên komînan, şêniyên bajêr, endam û rêveberên şaredariyan, saziyên civaka sivîl ên li bajêr beşdarî civînê bûn.

Di destpêka civînê de, xebat û projeyên şaredariyê yên 6 mehên derbasbûyî hatin vegotin. Li gorî plane şaredariyê di nava 6 mehan de projeyên sererastkirin û asfaltkirina rêyan, projeyên avê û kanalîzasyonê û kampanyayên paqijiyê pêk anîne.

Piştre nûnerên komînan û şêniyên bajêr der barê xebatên şaredariyê de nêrîn, rexne û pêşniyarên xwe anîn ziman. Piraniya nêrînan der barê xizmetguzariya rojane û binesaziyê de bûn.

Şêniyan pêşniyar kir ku şaredarî projeyên ronîkirina kolanan û taxan, başkirina rêyan û zêdekirina hejmara projeyên paqijî û kanalîzasyonê li bajar û gundan pêk bîne.

Hevşaredarê Til Temirê Ridwan El Xelef plana nîvê duyemîn a salê jî nirxand. Li gorî El Xelef di planê de projeyên başkirina binesaziya bajêr, nûkirin û asfaltkirina rêyên sereke û yên taxan, her wiha pêkanîna çend projeyên paqijiyê û kanalîzasyonê di nav tax û gundên bajêr de hene.

(k)