Salvegera damezirandina PYD'ê li Dêrazorê hat pîrozkirin

Partiya Yekitiya Demokratîk (PYD) bi boneya salvegera 22'yemîn a damezirandinê çalakiyek li kantona Dêrazorê li dar xist. Di çalakiyê de endamên Meclisa Sivîl a Dêrazorê, nûnerên komîteyên Meclisa Rêveber, nûnerên komîteyên jinan û yên Meclisa Ermenî beşdar bûn.

Di serî de hevserokê PYD'ê li kantonê Casim El Hor nameya Rêber Abdullah Ocalan a ji bo eşîrên Ereb xwend.

Piştre li ser navê Meclisa Malbatên Şehîdan endama Desteya Serokatiyê ya Meclisa Rêveber Huda El Xenam salvegera damezirandina partiyê pîroz kir û şehîdên azadiyê bi bîr anîn.

Hevseroka PYD'ê Perwîn Yûsif jî destnîşan kir ku peyama partiya wan avakirina projeyeke demokratîk û giştî ya li ser bingeha edalet û wekheviyê ye.

Perwîn Yûsif diyar kir ku rêya tekane û ya herî guncaw ji bo pêkanîna aramiyê diyaloga niştimanî û sazkirina destûreke demokratîk e ku bikare azadî û edaletê û mafên hemû pêkhateyan misoger bike.

Di dawiya axaftina xwe de Perwîn Yûsif destnîşan kir ku PYD'ê girêdana xwe bi peymana 10'ê Adarê teqez dike û wê wekî rêyeke niştimanî dibîne.

Piştre nûnerên Meclisa Sivîl a Dêrazorê di peyamên xwe de rola dîrokî û domdar a PYD'ê di parastina mafan de silav kir û teqezî bi domandina xebatên hevbeş di navbera hemû pêkhateyan de, da.

Çalakî bi sohbet û xurtkirina têkiliyan bi dawî bû.

(mh)

ANHA