Ruxmî astengiyên aborî amadekarî û rêûresmên Cejna Qurbanê didomin

Sibe (roja înê) Cejna Qurbanê ye. Li sûkên bajar û bajarokên Herêma Bakur û Rojhilatê Sûriyeyê bi hatina Cejna Qurbanê re tevgerek baş a kirîna pêdiviyên cejnê li gorî derfetan heye.

RUXMÊ BIHABÛNÊ AMADEKARIYÊN MEZIN

Li bajarê Şedadê yê kantona Cizîrê, welatî Hisên El Elî der barê amadekariyên cejnê de got: "Bi gelemperî biha guncaw in, bi taybet cil û şêranî û bi vê yekê malbat dikarin pêdiviyên zarokên xwe peyda bikin."

Li aliyekî din jî bazirgan Hemîd El Casim ê xwediyê dikana cil û bergan got îsal pêşwazîkirina cejnê baş e û wiha domand: "Biha li gorî rewşa debarê di ber çavan re tê girtin. Bihayê cilên zarokan di navbera 30 heta 300 hezar lîreya Sûriyeyê de û ev jî li gorî kalîte û cureya wê ye."

Xwediyê markêta li herêmê Ehmed El Cober diyar kir ku hewaya cejnê li sûkê aşkera ye û got: "Bihaya şêraniyan di navbera 15 û 50 hezar lîreya Sûriyeyê de ye û ew li gorî şêniyan baş e."

Li bajarê Til Temirê yê kantona Cizîrê, welatî Welîd Şakir El Ebdullah hêvî kir ku cejn bibe firseta bexişandinê, vegera penaber û koçberan li warên xwe.

Welatî Zehra Emîn jî diyar kir ku ruxmî zehmetiyan ew tevahî pêdiviyên cejnê amade dike û got: "Me şekir û şêranî kirîn û kilîçe li mal hazir kir. Li kêlek wê jî me cil û pêlav kirîn."

Zehra di dawiyê de got: "Bi vê boneyê, pîrozbahiyên xwe ji bo Rêber Abdullah Ocalan, şehîdan, hêzên ewlekariyê û QSD’ê yên li eniyan ku bi saya wan em di ewlehiyê de ne, pêşkêş dikin."

QURBAN Û RIHÊ HEVGIRTINÊ

Li Kobanê jî, şêniyan ji sûka li gundê Gulmêt ê başûrê bajêr dest bi kirîna qurbanan kir.

Welatî Mihemed Osman li ser vê yekê got bihaya kirîna pez îsal kêm bûye û wiha domand: "Par bihaya qurbanekî 300 dolar bû, lê îsal di navbera 100 heta 150 dolarî de ye. Ew jî ji ber ku mewsima çandiniyê lawaz bû û baran kêm bû."

Firoşkarê pez Xalid Nebo jî diyar kir ku firotin pir baş bûye û got biha li gorî rewşa giştî ye û di navbera 100 heya 200 dolarî de ye.

Her wiha welatiya bi navê Îslam Bozan Qadir kêfxweşiya xwe ya ji bo amadekariyên cejnê anî ziman û got: "Em hatin sûkê ji bo qurban bikirin, hemû li gorî derfeta xwe dikirin. Cejn boneyek e, em  her sal li bendê ne."

Welatî Ehmed Mehmûd anî ziman ku amadekariyên li Kobanê ji tevahî aliyan ve ye, ji cilan bigire heta bi qurbanan û got: "Em şahiyê bi malbatên şehîdan û şervanên QSD’ê re parve dikin."

ÎNSIYATÎFÊN MIROVÎ

Li bajarê Til Birakê jî bazirgan Hemdan El Seho însiyatîfa firotina şêraniyan bêyî qezencê da destpêkirin û got: "Ez dixwazim li gorî derfeta xwe alîkariya şêniyan bikim û gelek mirovan ev yek pêşwaz kir. Ji bazirganên din dixwazim ku heman gavê biavêjin."

Welatî Ehmed El Hisên ê ji Til Birakê jî bi hevrûkirina debarê re biha guncaw e û got: "Ruxmî rewşa aborî tevgera li sûkan baş e."

NIRXÊN HEVGIRTIN Û BEXIŞANDINÊ

Li Holê, Hac Îlyas El Salih cejna bi "Şahiyek giştî wesif kir, ku bi nimêja cejnê, dûre serdana xizman, serdana nexweşan pêk tê", her wiha diyar kir ku qurban pir girîng e, ji ber ku li kesên hewcedar tê belavkirin.

Hac Hisên Ebû Elî jî got ku cejn hevgirtina malbatan xurt dike û qurban jî li yên herî hewcedar tê belavkirin.

Li Dirbêsiyê jî Elî Salih li ser amadekarî û rêûresmên cejnê ku berî çend rojan, weke paqijkirina malan û çêkirina kilîçeyan, dest pê dike axivî û got: "Serdana gorên şehîd û miriyan û komkirina şekiran ji hêla zarokan ve hemû têkiliyên civakî xurt dikin."

NIRX ERZAN BÛNE

Welatî Mehmûd El Hisên ê ji Reqayê got ku nirxên kelûpelan ên îsal ji par erzantir in û ev jî ji ber başbûna nirxê lîreya Sûriyeyê li hember dolar e.

Welatî Îbrahîm El Xelef ê ji Tebqayê diyar kir ku nirxên kelûpelan bi rêjeya ji sedî 40 heya 50 erzan bûne, lê belê tevgera kirîn û firotinê hîn navînî ye. El Xelef hêvî kir ku roja weqfê anku roja beriya cejnê tevger baş bibe.

Seid El Selman ê ji kantona Dêrazorê destnîşan kir ku tevgera li bajarê Hecînê erênî ye û tevgera sûkê jî baş e. El Selman hêvî kir ku cejn bibe derfeta vejandina nirxên olî û civakî.

Ebdulhemîd El Hisên ê ji bajarê Hecînê got ku amadekariyên cejnê, bi kirîna qurbanan ku di cejnê li hewcedaran belav bikin, dest pê kirine.

Li bajarê Qamişloyê tevgera sûka navendî baş e. Şênî bi şahî kelûpelên cejnê dikirin û rewşek kêfxweşiyê di atmosfera sûkê de serwer e.

Tevî zehmetiyên jiyanî, şêniyên Bakur û Rojhilatê Sûriyeyê hewl didin rêûresmên cejnê vejînin û peyama girêdana bi baweriyên xwe û ruhê hevgirtin û hevbeşiyê nîşan bidin.

(mh/fr)