Rêveberiya Trafîkê der barê qezayan de daxuyanî da

Rêveberiya Giştî ya Trafîkê ya Herêma Bakur û Rojhilatê Sûriyeyê têkildarî qezayên trafîkê ku di demên dawîn de zêde bûne, daxuyaniyek weşand. Di daxuyaniyê de hate diyarkirin ku sedema sereke ya qezayan leza zêde û pêkneanîna rêzikên trafîkê ne.

Daxuyaniya Rêveberiya Giştî ya Trafîkê bi vî rengî ye:

"Rêveberiya Trafîkê bi fikareke mezin qezayên trafîkê yên ku vê dawiyê li seranserî Bakur û Rojhilatê Sûriyeyê zêde bûne, dişopîne. Di encama wan qezayan de gelek kes mirin û birîndar bûn. Ev jî bandoreke neyînî li ewlehî û aştiya civakê dike. Di heman demê de li ser me ferz dike wek sazî bi cidiyet nêzî sedemên qezayan bibin û berpirsyariyên parastina giyanan bi cih bînin.

Sedemên sereke yên van qezayan di serî de leza zêde, nepejirandina rêzik trafîkê, derbasbûna çewt û bikaranîna neewle ya wesayîtan in. Hin rewşên xemsariyê û nebûna lênêrîna bi rêk û pêk a wesayîtan jî bûne sedema zêdebûna qezayan."

Rêveberiya Trafîkê di dewama daxuyaniyê de îşaret bi van xalan kir:

- Li dijî kesên ku qanûnên traîfkê bi cih neynin dê cezayên tund hebin û dê hesab ji kesên ku jiyana yên din dixin xetereyê, bê pirsîn.

- Divê ajokar li gorî leza ku hatiye diyarkirin û nîşaneyên trafîkê tev bigerin.

-  Bi armanca belavkirina çanda silametiya trafîkê em banga lidarxistina pêngavên hişyarkirinê li gel saziyên ragihandinê û yên civakî dikin.

- Bi armanca ku di qezayan de bersiva lezgîn were dayîn, koordîne bi aliyên tenduristî û ewlehî re were xurtkirin.

- Ji bo pêşîgirtina li cezayan em bang li malbatan û civakê dikin ku bibin alîkar; şîretan li ajokaran, bi taybetî jî ciwanan bikin.

Em ji malbatên qurbaniyên qezayên qezayên trafîkê re sersaxiyê û ji birîndaran re şîfaya lezgîn dixwazin. Careke din em diyar dikin ku em ê mîsyona xwe ya pêşxistina ewlehiya trafîkê bidomînin. Em bang li hemû ajokaran dikin ku ji bo parastina giyanan berpirsyariyên xwe yên mirovî û yasayî pêk bînin.

Pêkanîna qanûnên trafîkê berpirsyariya her kesî ye. Tevkarî rêya me ya parastina giyanan e.”

(bb)