QSD’ê şehadeta 4 şervanan ragihand

Navenda Ragihandinê ya Hêzên Sûriyeya Demokratîk (QSD) bi daxuyaniyeke nivîskî nasnameyên 4 şehîdan aşkera kirin.

Daxuyanî wiha ye: "Em bi rûmet û serbilindahî bejna xwe li hemberî 4 hevreyên xwe yên şehîd ditewînin. Hevreyên me bi lehengî bersiva êrişên dewleta Tirk a dagirker ên ser xaka me dan. Bi xwîna xwe ya pak rûpeleke ku nayê jibîrkirin di destana Bendava Tişrînê de nîvisandin. Li xurtî û dilê ku bi baweriya bi welatekî azad lê dide, li hemberî alava nûjen a şer li ber xwe dan.

NÛCAN GABAR (YARA MISTAFA): SEMBOLA  JINA CIWAN A AZAD Û RUHÊ WÊREKIYA KU NAYÊ ŞIKANDIN

Hevrê Nûcan Gabar, sembola jina Kurd a azad, zane û şoreşger nîşan da. Ji dema ku tev li refên hêzên me bûbû ve di wê baweriyê de bû ku parastina welat ne vebijarkek e, lê belê qeder û berpirsiyariyek. Nûcan ji malbatek welatparêz e ku nifşê li pey nifşekî şehîdan daye. Tevlêbûna Nûcan jî berdewama vê mîrateya kevnar bû.

Nûcan li Bendava Tişrînê li pêş bû. Bi rûkenî û ji xwe bawer bersiva êrişan didan. Her wiha hêz û moral dida hevalên xwe. Nûcan 13’ê Çileya 2013’an de şehîd bû. Bi têkoşîna xwe wêneyeke zelal a jina şerker a ku bi îradeya xwee mucîzeyan çêdike û bi xwîna xwe rêya serkeftin û rûmetê dinîvisîne, nîşanî cîhanê da.

TÊKOŞER EFRÎN (ÎBRAHÎM OMER): DILÊ JI AGIR, ÎRADEYA JI POLA, SEMBOLA FERMANDARÊ AQLIMEND

Hevrê Têkoşer Efrîn ji wan kesan bû ku bi bawerî rêya şoreşê hilbijart. Tevlêbûna wî ya nava refên hêzên me ji wî re bû destpêkeke jiyanê. Ji têkoşerekî ciwan bû fermandarekî meydanî yê mînak. Hevrê Têkoşer her şerek wekî peywirek pîroz didît û her kêmaniyek jî wekî xiyanet li xwîna pak didît, ev taybetmendî jî di şerê Bendava Tişrînê de destnîşan kirin. Di nava êrişan de pêşengê hevalên xwe bû û serkeftin li pey yek din pêk dianîn. Hevrê Têkoşer Di 13’ê Çileya 2025’an de şehîd bû.

XEBAT BAZ (WELAT XALID)

Hevrê Xebat Baz mînaka şervanê zane bû. Di navbera zanebûn û xebata meydanî de hevsengî çêdikir. Di malbateke welatparêz de bû ku rihê wê yê şoreşgerî kûr e.  Ji dema ku tev li refên hêzên me bû, bi dîsîplîna xwe dihat nasîn  û giranî dida ser pirsgirêkên cewherî.

Hevrê Xebat şervan perwerde dikir û kesayeta wan pêş dixin. Bi keda wî nişfên şoreşger ava kirin ku beriya çekê bi zanebûnê li pêş in.

Hevrê Xebat Baz di şerê Bendava Tişrînê de heya kêliya dawîn şer kir. Di wê baweriyê de bû ku şehadet lûtkeya rasteqîn a azadiyê ye. Hevrê Xebat 13’ê Çileya 2025’an şehîd bû.

SÎDAR (ELÎ MIHEMED HEMÎD DERWÎŞ)

Hevrê Sîdar ji şervanên destpêkê bû ku di salên wê yên destpêkê de tev li refên hêzên me bû. Di pêngavên rizgarkirina Dêrazor û Minbicê de cih kir û helwestên lehengî û dilsoziyê ku nayên jibîrkirin nîşan da.

Hevrê Sîdar li pira Qereqozaqê heya fîşeka dawîn li hemberî dijmin şer kir. Di wê baweriyê de bû ku parastina axê erkek e. Di 16’ê Kanûna 2024’an de şehîd bû.

Em 4 hevreyên xwe yên leheng oxir dikin. Em ne bedenên wan oxir dikin. Lê em meqamên ji biryardayîna ku bi xwîna xwe dîrok afirandine oxir dikin. Em sersaxiyê ji malbatên wan re dixwazin. Em soz didin xwîna wan a pak ku em wefedarên rêya wan bin. Em ê bê teredudu berxwedanê bidomînin ta xeyalên wan bi cih bînin. Em ê heya bidawîkirina dagirkeriyê ala wan bilind bihêlin. Dê roja azadiya careke din li ser xaka me hil were."

Li gorî daxuyaniyê agahiyên der barê nasnameyên şehîdan de wiha ne:

Nasnav: Nûcan Gabar

Nav û paşnav: Yara Mistefa

Navê dayikê: Emîne

Navê bav: Mihemed

Cihê jidayikbûnê: Efrîn

Cih û dîroka şehadetê: Bendava Tişrîn-13 Çile 2025

Nasnav: Têkoşer Efrîn

Nav û paşnav: Îbrahîm Omer

Navê dayikê: Hêvîn

Navê bav: Nîdal

Cihê jidayikbûnê: Efrîn

Cih û dîroka şehadetê: Bendava Tişrîn- 13 Çile 2025

Nasnav: Xebat Baz

Nav û paşnav: Welat Xalid

Navê dayikê: Ranya

Navê bav: Şehrezad

Cihê jidayikbûnê: Efrîn

Cih û dîroka şehadetê: Bendava Tişrîn-13 Çile 2025

Nasnav: Sîdar

Nav û paşnav: Elî Hemîd Derwîş

Navê dayikê: Zekiye

Navê bav: Mihemed

Cihê jidayikbûnê: Minbic

Cih û dîroka şehadetê: Pira Qereqozaqê- 16 Kanûn 2024.

(bb)