Platforma Çalakiyên Hevbeş ji bo danîna bernameya 25'ê Mijdarê civiya

Platforma Çalakiyên Hevbeş ên Tevger û Rêxistinên Jinan ên Bakur û Rojhilatê Sûriyeyê di rojên borî de ji bo danîna bernameya çalakiyên 25′ê Mijdarê  Roja Têkoşîna Li Dijî Tundiya Li Ser Jinan a Cîhanê civiya.

Platform ji Meclisa Jinan a Bakur û Rojhilatê Sûriyeyê, Meclisa Jinan a Sûriyeyê, Koordînasyona Jinan a Rêveberiya Xweser a Bakur û Rojhilatê Sûriyeyê, Kongra Star, Kombûna Jinan a Zenûbiya, Yekitiya Jinan a Suryanî, Meclisa Jinan a Partiya Yekitiya Demokratîk (PYD), Meclisa Jinan a Partiya Sûriyeya Pêşerojê, Yekitiya Jinên Ciwan, Nivîsgeha Jinan a Meclisa Sûriyeya Demokratîk (MSD), Nivîsgeha Jinan a Tevgera Civaka Demokratîk (TEV-DEM), Navenda Lêkolîn û Parastina Mafên Jinan a Sûriyeyê, Komîteya Jinan a Rêxistina Mafên Mirovan a Herêma Cizîrê, Tora Pêşengên Aştiyê, Rêxistina Sara ya Têkoşîna Li Dijî Tundiya Li Ser Jinan Komeleya Şawîşka, Tevgera Hîlala Zêrîn û Weqfa Jinên Azad pêk tê.

Platform hewl dide xebatên tevgerên jinan di çarçoveya çalakiyên jinan ên li Bakur û Rojhilatê Sûriyeyê pêş bixe û destekê bide doza jinan li Sûriye û cîhanê.

Endama Koordînasyona Meclisa Jinan a Bakur û Rojhilatê Sûriyeyê Stêr Qasim destnîşan kir ku ew ji bo danîna bername û dirûşmên hevbeş ên çalakiyên 25'ê Mijdarê civiyan.

Stêr Qasim got: "Di her boneyekê de platform dicive da ku nêrîn bên parvekirin û nîqaş der barê naverokên çalakiyan û yekkirina dirûşmên wan de tên kirin. Ev civîn gelek rojan didomin û bername li gor rewşên herêmê tê diyarkirin. Bernameya pêngavê jî dê bi daxuyaniyekê were aşkerakirin."

Stêr Qasim da zanîn ku di bernameya Roja Têkoşîna Li Dijî Tundiya Li Ser Jinan a Cîhanê de  dê semîner li hemû gund û bajaran werin dayîn û panelên diyalogê û meşên girseyî dê bên lidarxistin.

(mh)

ANHA