Pêşengê Tevgera Ciwanan şehîd Çiya Rizgar li Kobanê hat bi bîranîn

Ji aliyê Tevgera Ciwanên Şoreşger a Sûriyeyê li kantona Firatê ve şehîd Çiya Rizgar hat bibîranîn. Di bîranînê de hat diyarkirin ku wê bi hezaran dewsa şehîd Çiya bigrin.

ROJANE

3 îlon, 2025 21:52

KOBANÊ

Bi dehan malbatên şehîdan û ciwanên kantona Firatê ji bo bîranîna şehîd Çiya Rizgar li Goristana Șehîd Dîcle ya başûrê bajarê Kobanê tev li merasîma bîranînê ya endamê Koordînasyona Komalên Ciwanan şehîd Çiya Rizgar bûn û soza şopandina riya şehîdan dan.

Piştî deqeyekê rêzgirtinê, ji rêveberên Tevgera Ciwanê Şoreşger a Sûriyeyê Şevger Mehmûd axivî û diyar kir ku dê bi hezaran ciwan dewsa şehîd Rizgar bigrin û got; “Em weke tevgera ciwanan, soz didin ku riya şehîdan bişopînin. Şehîd Rizgar bi fedayî li hemberî her cure qirkirinê serî hilda û bê rawestandin berxwedaneke dîrokî meşand. Îro jî em soz didin şehîd Rizgar ku em ê xeta wî ya azadiyê bişopînin û wê bi hezaran dewsa rizgaran bigrin."

Dûra jî sinefizyonek li ser jiyana şehîd Çiya Rizgar hate pêşandan, li ber wêneya wî, mûm hatin vêxistin. Merasîma bîranînê bi berzkirina sloganên “şehîd namir in” bi dawî bû.

(EKÎB)

ANHA