Nûnera Yekitiya Mamosteyan bi nûnerên ITUC’ê re civiya
Nûnera Yekitiya Mamostayan a Bakur û Rojhilatê Sûriyeyê bi nûnerên Yekitiya Sendîkayên Karkeran a Navneteweyî (ITUC) re hevdîtin pêk anî.
Nûnera Yekitiya Mamosteyan a Bakur û Rojhilatê Sûriyeyê Nisrîn Reşik li paytexta Belçîkayê Brukselê, bi nûnerên Yekitiya Sendîkayên Karkeran a Navneteweyî (ITUC) re civiya.
Di hevdîtinê de behsa rewşa civaka sivîl a li Bakur û Rojhilatê Sûriyeyê hate kirin, her wiha rewşa xebata civaka sivîl li seranserî Sûriyeyê bi awayekî berfireh hate gotûbêjkirin.
Nûnerên ITUC’ê girîngiya hevkarî û piştgiriya rêxistinên civaka sivîl li Bakur û Rojhilatê Sûriyeyê anî ziman. Her wiha diyar kirin rêxistinên civaka sivîl li Bakur û Rojhilatê Sûriyeyê yên herî birêxistinkirî û çalak in li Sûriyeyê.
Nûnera Yekitiya Mamosteyan Nisrîn Reşik zêdetirî mehekê ye li çend welatên Ewropayê li gel nûnerên sazî û rêxistinên civaka sivîl hevdîtinan pêk tîne.
