Meclisa Edaletê 66 girtî radestî şêxên êşîran ên Sirînê kirin

Meclisa Edaleta Civakî ya bajarê Kobanê û Hêzên Ewlekariya Hundirîn 66 girtiyên ji pêkhateyên Ereb ên ji Sirîn, Reqa, Tebqa û Dêrazorê yên ku berê di girtîgeha Eqtana ya bajarê Reqa de bûn û piştre anîbûn girtîgeha Kobanê, radestî Komîteya Şêxên Eşîran ên Sirînê kirin.

Radestkirina girtiyan li ser rêya di navbera gundê Itwêran û Pîrekê yê li başûrê Kobanê de pêk hat.

Li cihê ku girtî radestî şêxên eşîran hatin kirin, endamê Meclisa Edaletê ya bajarê Kobanê Îbrahîm Muslim axivî û got: "Em îro 66 girtiyên ji deverên Tebqa, Reqa, Dêreozor û Sirînê radestî Komîteya Şêxên Eşîran ên Sirînê dikin. Ev girtî bi tohmetên cuda hatibûn girtin. Meclisa Edaletê ya Kobanê û Komîteya Şêxên Eşîran ên Reqa û Sirînê li hevkirinek kir ku em girtiyan radestî wan dikin û wan digihînin xwediyên wan. Me bi rêk û pêk navên her girtiyekî xwend û me 66 girtî radestî komîteyê kirin."

Îbrahîm Musliim da zanîn ku ew ê her tim aştiya navxweyî ya gelan biparêzin da ku bikarin Sûriyeyeke demokratîk û azad ava bikin.

Şêxê Eşîra One ya bajarê Sirînê Behrî Şêx Elî jî wiha got: "Em spasiya Rêveberiya Kobanê dikin ku ev girtî radestî Komîteya Şêxên Eşîran kirin. Em ê jî wan radestî xwediyên wan bikin. Em ê her tim ji bo çareseriyan di nava tevgerê de bin."

(sş/bb)

ANHA