Li Tebqayê xebatên amadekirina navendên ezmûnan didomin

Di çarçoveya rêkeftina dawîn a di navbera Rêveberiya Xweser û Hikumeta veguhêz a Sûriyeyê de, Yekitiya Şaredariyan a Tebqayê xebatên amadekirina navendên ezmûnan ji bo xwendekarên bawernameyên navîn û amadehî didomîne. Wê ezmûn li bajarokên Mensûra û Dibîs werin kirin.

Meclisa Rêveber a Kantona Tebqayê ji bo şopandina proseya ezmûnan komîteyek ava kir. Komîte ji endamên desteyên perwerde û fêrkirinê, tenduristî, enerjî, nivîsgehên ragihandinê û peywendiyan, Yekitiya Şaredariyan û Gerînendetiya Sotemeniyê hat avakirin.

Li gorî vê, Yekitiya Şaredariyan xebatên paqijî û amadekirina navendên ezmûnan kirin, daniştokên ezmûnan veguhastin û ava vexwarinê li dibistanan dabîn kir. Her wiha yekitiyê erebeyên agirkujiyê amade kirin û wê di dirêjahiya proseya ezmûnan de li navendan bin.

Hevserokê Şaredariya Gel a Mensûrayê Salih El Salih têkildarî mijarê ji ajansa me re axivî û got: "Şaredarî xebatên xwe di çarçoveya avakirina maseya krîzê de, ya ji bo serketina proseya ezmûnan dike."

El Salih wiha domand: "Şaredariyan 9 dibistanên li Mensûrayê ji bo navendên ezmûnan hatine diyarkirin, paqij kirin. Dibistan li van herêman in; Um El Qura, Mensûra Bakur, El Musteqbel, dibistana navîn a Mensûra, Mihemed Nûr, El Qudis, Hesan Bin Sabit, Firat û El Huriye. Li Dibsî jî li 8 dibistan wê ezmûn bên kirin; Derar Bin El Ezwer, Ibin Reşîd, Hanî El Hemod, Xelîl El Hemod, Ebî Bin Ebî Talib, Dibsî Efnan, Dibsî Ferec xeleka yekemîn û Dibsî Ferec xeleka duyemîn."

Xebatên Yekitiya Şaredariyan roja çarşemê (11’ê Hezîranê) dest pê kir û dê roja duşemê (17’ê Hezîranê) bi dawî bibin. Bi wê re navendên ezmûnan ji bo pêşwazîkirina xwendekaran bi temamî amade dibin.

(fr)

ANHA