Li Tebqayê şehîd hatin bibîranîn

Meclisa Malbatên Şehîdan a Kantona Tebqayê ji bo bîranîna şehîdên mehên Kanûn, Çile, Sibat û Adarê merasîmek li Pakrewangeha Şehîdên Tebqayê li dar xist. Malbatên şehîdan, endam û rêveberên Rêveberiya Xweseriya Demokratîk a Kantona Tebqayê, Meclisa Kombûna Jinan a Zenûbiya, partiyên siyasî, saziyên civaka sivîl, şervan û fermandarên Cebhet El Ekrad, Hêzên Ewlekariya Hundirîn, Meclisa Leşkerî ya Tebqayê û bi sedan koçberên ji Efrîn û Şehbayê û şêniyên Tebqayê amade bûn.

Merasîmê bi deqeyeke rêzgirtina ji bo şehîdan dest pê kir û malbatên şehîdan mûm li ber wêneyên şehîdan pêxistin. Paşê hevserokê Meclisa Rêveber a Rêveberiya Xweseriya Demokratîk a Kantona Tebqayê Ehmed El Omer şehîdên azadiyê bi bîr anîn û got gelê Sûriyeyê wek ronahî û hêviya rizgariyê li QSD’ê dinêre.

El Omer anî ziman ku projeya neteweya demokratîk ji bo azadiya gelê Sûriyeyê hêviya yekane ye û wiha domand: "Hin dixwazin bi rêya komkujiyên li perava Sûriyeyê û êrişên li ser Bakur û Rojhilatê Sûriyeyê, welat vegerînin çargoşeya ewil. Lê bi hebûna Rêveberiya Xweser dê ev qonax derbas bibin. Lihevkirina bi Şamê re encamên rêgezên me yên sabit û fedakariyên me yên mezin e."

Piştre sînevîzyonek li ser şehîdên her çar mehan hate pêşandan û merasîm bi dirûşman bi dawî bû.

(bb)

ANHA