Li Sûriyeyê berf û baran; zehmetiyên niştecihên kampan zêdetir bûn

Li piranî deverên Sûriyeyê baran û berf dibare, zirarek mezin bi binesaziyan bû, rêyên sereke û şaxî qut bûn, nexasim li deverên bilind ên zêdetirî 500 metreyan ji ser rûyê deryayê.

Li deverên Idlibê û gundewarê bakurê Helebê, berfir xurt barî, bi wêr e gelek rê qut bûn, zehmetiyên çûn û hatinê çêbûn.

Li perava Sûriyeyê jî, bi taybet li Banyas ji ber barana gur lehî çêbûn, kolan û sûk di bin avê de man û ava herikê malan.

Li parêzgeha Tertûsê jî, ji ber bayê xurt û baranê dar ketin ser erebeyan û rêyên herêma Şêx Bedir qut bûn, li têketina bajarê Qedmûs jî ax hilweşî û di navbera Girava Erwad û Tertûsê de tevgera veguhastina deryayî sekinî.

Li gundê Seidanê yê Qedmûsê lehî çêbû, zirar gihand rûberên çandiniyê û malan.

Li gundewarê Laziqiyê, bi taybet li bajarokê Silinfê mijar, baran û qeşa hebû. Li Sehil El Xab û gundewarê rojavayê Hemayê jî, gundê Enab û bajarokê Şerîa lehî çêbûn, gelek mal biav bin û rêyên xwecihî hatin girtin.

Li bakurê welat, bi taybet li Efrîn û bajarê Babê yê gundewarê Helebê berf û baranê bariya. Vê yekê bandor li niştecihên kampên Yazibaxê yên li derdora bajarê Ezazê kir.

Li gorî jêderên xwecihî, şêniyan banga destwerdana lezgîn û dabînkirina piştgiriyê kir, bi taybet li deverên kampê lê hene.

Li hin deverên Herêma Bakur û Rojhilatê Sûriyeyê ev 3 roj e berf dibare.

(fr)

ANHA