Li Şehbayê merasîma xiyabî ya şehîd Berfîn Zîlan

Meclisa Malbatên Şehîdan a Kantona Efrîn û Şehbayê ji bo gerîleya HPGˊê şehîd Berfîn Zîlan merasîma xiyabî li dar xist.

Gerîlaya HPG'ê Berfîn Zîlan (Rîma Abdullah) di 7'ê Nîsanê 2024'an de li qada Zapê ya Herêmên Parastinê yên Medyayê şehîd bû.

Bi beşdariya endamên saziyan, nûnerên siyasî û bi dehan koçberên Efrîn û şêniyên Şehbayê merasîm hat lidarxistin.

Merasîm li pêşiya Meclisa Malbatên Şehîdan li gundê Til Qerahê yê bajaroka Ehdas dest pê kir.

Di merasîmê de endama Meclisa Malbatên Şehîdan a Kantona Efrîn û Şehbayê Şaziya Îbrahîm axivî.

Şaziya wiha got: "Şehîdên me bi coşek herî mezin û bi dilekî germ li hemberî dewleta Tirk a dagirker berxwedana herî mezin dan meşandin. Dijmin dixwaze gelê kurd tune bike lê em ê bi saya şehîdên xwe dijmin têk bibin. "

Endama Meclisa Kongra Star a Kantona Efrîn û Şehbayê Rîhab Elo sersaxiya da malbatên hemû şehîdan û got: "Em ê her tim li ber xwe bidin. Bila dijmin bizane ku tu carî gelê kurd dest ji têkoşîn û berxwedan bernade."

Piştî axaftinê wesîqeya şehadetê hate xwendin û radestî malbatê hate kirin.

Merasîm bi siloganên "Şehîd Namirin" bi dawî bû.