Li Helebê 47 xwendekar derçûn

Komîteya Perwerdeyê û Fêrkirinê ya Civaka Demokratîk bi dirûşma "Destkeftiyên berxwedana Helebê bi meşaleya zanînê tê vejandin" ji bo derçûna koma yekem a 47 xwendekarên Peymangeha Amadekirina Mamosteyan a Şehîd Zozan Yûsif, merasîmek li dar xist.

Merasîm li Hola Elwan a li herêma Şiqeyêf a taxa Şêxmeqsûd a Helebê hate lidarxistin, xwendekarên derçûyî û malbatên wan, her wiha endam û nûnerên partiyên siyasî, rêxistinên civaka sivîl û meclisan beşdar bûn.

Di merasîman de, rêvebera Nivîsgeha Jinan a Meclisa Giştî ya taxên Şêxmeqsûd û Eşrefiyê Şêrîn Şêxo, diyar kir ku bi saya fedakariya şehîdan, xwendekar karibûn bawernameyên xwe bistînin û serkeftinan bi dest bixin.

Her wiha hevseroka Peymangeha Şehîd Zozan Yûsif, Fatima Koşan axivî û ji xwendekaran re got: "Hûn hêviya civakê ne, divê hûn berpirsiyariya perwerdekirina nifşên pêşerojê û avakirina neteweyî hilgirin ser xwe."

Hevseroka Komîteya Perwerde û Fêrkirinê ya Civaka Demokratîk Zehîde Reşîd destnîşan kir ku fêrbûna bi zimanê dayikê bi saya hewildanên xwendekarên xwe civak dê pêş dikeve.

Piştre Komîteya Perwerde û Fêrkirinê ya Civaka Demokratîk û rêveberên Peymangeha Şehîd Zozan Yûsif di nav atmosfereke coş, bawernameyên xwendekaran belav kirin.

Di dawiyê de hunermend, komên stranbêjiyê û komên folklorê jî berhemên hunerî pêşkêş kirin û kesên hazir jî govend gerandin.

(ac/mh)

ANHA