Li 3 bajaran malbatên dîlgirtiyan li qadan bûn

Tevî malbatên dîlgirtiya, bi sedan şêniyên bajarên Qamişlo, Dêrik û Girkê Legê bi daxwaza serbestberdana dilgirtiyên li cem hêzên hikukumeta demkî xwepêşandan li dar xistin.

QAMIŞLO

Malbatên dîlgirtiyan ên li bajarê Qamişloyê bi daxwaza serbestberdana dîlgirtiyan meşek li dar xist. Meşa ku şêniyên bajar jî tev lê bibûn, ji çerxerêya Efrînê dest pê kir û li pêşiya Pakrewangeha Delîl Saroxan veguherî mîtîngê.

Wêneyên dîlgirtiyan hatin hildan û pankartên bi nivîsên "Em dixwazin tavilê dîlgirtî werin berdan", "Li pişt her dîlgirtiyekî dilekî şikestî yê dayikê heye", "Azadî ji dîlgirtiyên me re" û "Azadiyê talqo nekin..Temen li bende namîne" hatin vekirin. Bê navber jî dirûşmên bi daxwaza aşkerakirina çarenûsa dîlgirtiyan û serbestberdana wan hatin berzkirin.

DÊRIK

Li bajarê Dêrikê jî bi sedan şênî û malbatên dîlgirtiyan meşek girseyî li dar xist. Di meşa ji qada Azadî dest pê kir de, wêneyên dîlgirtiyan û pankartên "Dîlgirtiyan serbestberdin", "Em li benda dîtina te ne" û "Azadî ji hevalên min re"hatin vekirin.

Meş li sûka navendî ya bajar sekinî û deqeyek rêz hat girtin. Li vir hevserokê Meclisa Bajarê Dêrikê Lawîn Cidai banga serbestberdana dîlgirtiyan kir û ev tişt got "Şervanên QSD'ê parastina mirovahiyê kir.  Doza dîlgirtiyan dozeke mirovî ye, ne siyasî, nabe wekî kaxeza bazariyê were bikarnaîn."

Malbatên dîlgirtiyan û şehîdan banga serbestberdana dîlgirtiyan û radestkirina cenazeyên şehîdan kirin. Her wiha îşaret pê kir ku heya daxwaza wan bi cih neyê  dê qadan bernedin.

GIRKÊ LEGÊ

Li bajarê Girkê Legê jî bi sedan şênî, malbatên dîlgirtî û windayan meşek li dar xist.

Girse ku wêneyên dîlgirtiyan hildan û pankartên bi daxwazên azadkirina wan vekirin, ji qada Şehîd Xebat bi sûka sereke ya bajar ve meşiyan.

Meş li sûka navendî sekinî deqeyek rêz hat girtin. Beşdaran bang li aliyên têkildar kir ku bilez dosyaya dîlgirtiyan çareser bikin û dîlgirtî berdan. Her wiha gotin, heya daxwaza wan bi cih neyê dê li qadan bin.

(bb)

ANHA