Koçberên Serêkaniyê: Bêyî derxistina dagirkeran em nikarin behsa vegerê bikin

Ji dema ku dewleta Tirk a dagirker û çeteyên wê bajarên Efrînê di sala 2018`an de û Serêkaniyê û Girê Spî di sala 2019`an de dagir kirin, bi sed hezaran sivîl ji ber bombebaran û binpêkirinan bi darê zorê ji deverên xwe koçber bûne. Piraniya wan li kamp û stargehên li seranserê herêmên Bakur û Rojhilatê Sûriyeyê dijîn.

Jinên koçber ên ji bajarê Serêkaniyê yê dagirkirî ku li bajarê Til Temirê dijîn, diyar kir ku vegera bêyî garantiyên ewlehiyê yên rastîn tê wateya vegera nava xetereyê.

Meha El Wecrî koçbereke ji Serêkaniyê ye, der barê mijarê got: "Em dixwazin vegerin bajarê xwe, lê ne di rewşeke tarî de. Heta ku dagirkeriya Tirk û çeteyên wê li wir bin, jiyana me dê di xeteriyê de be. Ji bo parastina me û mafê me yê li ser erd û malên me, em hewceyê garantiyên navneteweyî ne."

Mehayê wiha lê zêde kir: "Vegera ewle ne tenê bi vekirina rêyan e, lê divê dagirkeriya Tirk vekişe, binpêkirinan bêne rawestandina û saziyên me yên herêmî vegerin herêmê. Divê vegera bi komî be da hemî koçberên ku bajarên wan hatine dagirkirin karibin vegerin. "

Munîra El Xelîl koçbereke ji gundewarên Serêkaniyê yê dagirkirî ye, diyar kir ku hebûna dagirkeriya Tirk sedema bingehîn a aloziyê ye. Li herêmên dagirkirî niha kiryarên guhertina demografîk a sîstematîk tên kirin. Malbatên çeteyên Tirk bi zorê li malên koçberan hatine bicihkirin, her wiha vegera şêniyên resen tê astengkirin.

Munîrayê wiha dewam kir: "Em dixwazin vegerin, lê kî dê me biparêze dema ku dagirkeriya Tirk û çeteyên wê li wir bin? Heta ku çek destê wam koman de be, em nikarin vegerin. Tiştê ku ji bo vegera me hewce dike, derxistina van koman ji bajarê me yê dagirkirî ye.”

Lemîs Medana jineke ciwan a ji bajarê Serêkaniye koçber bûye, got: "Vegera takekesî xetereyeke mezin e, ji ber ku her kesê ku bi tena serê xwe vedigere, rastî revandin, zorbazî an kuştinê tê. Em hemû dixwazin vegerin, lê di bin parastina navneteweyî û garantiyên qanûnî de."

Lemîsê destnîşan kir ku dagirkeriya Tirk naxwaze xwediyên resen ên erdê vegerin, ji ber ku ew dixwaze nasnameya herêmê tune bike û niştecihên nû li şûna wan bi cih bike û got: "Ji ber vê yekê, heya ku dagirkeriya Tirk venekişe û rêveberiya herêmê nekeve destê şêniyên wê, em nikarin behsa vegerê bikin.”

(k)

ANHA