Ciwanan zehmetî û rola xwe di Sûriyeya nû de gotûbêj kirin

Meclisa Ciwanên Sûriya Demokratîk bi diruşma "Xurtkirina ciwanan… ji paşguhkirinê ber bi pêşengiyê ve" li hola Baron a li nava Helebê paneleke diyalogê li dar xist. Di panelê de ciwanên partiyên siyasî, Saziyên Civaka Sivîl û kesayetên serbixwe amade bûn.

Hevserokê Meclisa Ciwanên Sûriya Demokratîk Nasir Nasro mijara panelê bi rê ve bir. Di mijarê de xurtkirina ciwanên Sûriyeyê û pêwîstiya veguhastina wan ji paşguhkirinê ber bi rolên pêşeng ên di tevahî aliyan jiyanê de hatin nîqaşkirin.

Mijarên ku keç û xortan nîqaş kirin ev bûn; beşdariya siyasî û biryardanê, xurtkirina aborî û peydakirina derfetên alternatîf, nasnameya çandî û aîdiyet, xurtkirina derûnî û dîjîtal, rola perwerdehiyê û edaleta zayendî, edaleta avhewayê û xurtkirina jinên ciwan.

Di nîqaşan de gerînendeyê saziya perwerdehiyê Cemîl Uwêce axivî û banga girêdana xwendina zanîngehê bi sûka xebatê bi rêya atolyeyên hişyarî û însiyatîvên civakî kir.

Her wiha endama Partiya Sûrî ya Neteweyî ya Civakî Seher Zîne axivî û girîngî da çaksazkirina bingehîn a meteryalên xwendinê, ji bo vekirina asoyên fikirandina azad li pêş ciwanan.

Dr. Ehmed Esfer jî diyar kir ku ciwan dînamoya bingehîn a hilweşîna dîktatoriyan e û banga parastina pirrengiya çandî weke bilindkirina demokrasiyê kir.

Di dawiyê de hevserokê Meclisa Sûriya Demokratîk Nasir Nasor pêşniyar û nêrînên panelê xwendin.

Di daxuyaniyê de hat diyarkirin ku mijarên ku bandorên li ciwanên Sûriyeyê dikin bi taybet di aliyê xurtkirina civakî, zanistî, siyasî û perwerdehiyê de di panelê de hatin nîqaşkirin û hat destnîşankirin ku ciwanên Sûriyeyê ji bo avakirina siberojê hêza aktîv in û divê jîngeheke perwerdehiyê ji bo teşwîqkirin, afirînerî û afirandinê were avakirin.

Meclisê di daxuyaniya xwe de da zanîn ku divê derfetên aborî yên rastîn ji ciwanan re bi rêya însiyatîfên teşwîqkirina ciwanan li ser afirîneriyê û pêkanîna serxwebûna aborî werin peydakirin.

Di daxuyaniyê de rewşa xwendekarên Sûriyeyî yên li derve, zehmetiyên penaber di mijara vegerê de dikişînin hatin nirxandin, her wiha banga avakirina jîngeheke perwerdehî û civakî hat kirin ku bikare wan vehewîne û teşwîqî vegerê bikin ku di avakirina welat de bibin alîkar.

Meclisê di daxuyaniya xwe de bang kir ku derfeteke mezin li pêş ciwanan di biryardayînê de û beşdariya aktîv di pêvajoya siyasî de bê vekirin û ji bo avakirina platforên ciwanan ku bikarin nêrînên xwe derbirînin û rola xwe ya siyasî di saziyên siyasî û desteyên giştî de pêk bînin piştgirî bê dayîn.

Di dawiyê de bang li ciwanan diyasporê hat kirin ku vegerin û di avakirina siberojê de beşdar bibin.

(fr)

ANHA