Ji Dêrikê peyama ‘Dest bi dest bi QSDˈê re’

Bi sedan şêniyên Dêrikê bi meşekê êrişên dewleta Tirk a dagirker û çeteyên wê yên li ser Herêma Bakur û Rojhilatê Sûriyeyê şermezar kirin û piştgiriya xwe bi QSDˈê re anî ziman.

Şênî ji Qada Azadî heya Sûka Navendî meşiyan. Di meşê de alên QSD û Rêveberiya Xweser hatin hildan.

Li Sûka Navnedî jî deqeyekê rêz hat girtin. Piştre endamê Meclisa PYDˈê ya Dêrikê Merwan Hemo axivî û got QSD hêza yekane ye ku li hemberî êrişên dewleta Tirk a dagirker û çeteyên wê sekinî û gelê Sûriyeyê parast.

Merwan Hemo bi domdarî got: "Guhertinên bingehîn li Sûriyeyê çêdibin, divê em bi QSD’ê re bin û hay ji fitne û şerê taybet hebin ku dewleta Tirk û çeteyên wê dikin.”

Hemo bi bîr xist ku hêzên li Bakur û Rojhilatê Sûriyeyê ji destpêka aloziyê ve berpirsyariya dîrokî ya parastina gelên herêmê ji êrişan girte ser xwe û ev zêdetirî 10 sal e vê berpirsyariyê bi cih tînin û got: "Ji ber vê yekê erka me ye ku em bi hemû hêza xwe piştgiriya vê hêzê bikin, li hemberî êrişên dagirkerî û qirkirinê bisekinin û projeya xwe ya Rêveberiya Xweseriya Demokratîk biparêzin."

Meş bi dirûşmên silavkirina berxwedana QSDˈê bi dawî bû.

(bb)

ANHA