Ji bendavê peyamên berxwedanê: Bendava Tişrînê sembola berxwedanê ye

Gelê bajarên Hesekê, Dirbêsiyê, Amûdê, Til Temir, Zirgan û Şedadê yê ku li Bendava Tişrînê di nobedê de bûn, îro vegerîn û bi coçeke mezin û bi tilîliyên dayikan ên xelkê kantona Cizîrê hat pêşwazîkirin.

NOBEDARIYA GEL BERXWEDANA DIJÎ DAGIRKERIYÊ NÎŞAN DIDE

Xelkê van bajarên li kantona Cizîrê di 10ˋê Çileyê de berê xwe dabû Bendava Tişrînê û nobed ji nobedarên berê li wir dewr girt û wan jî nobedarî dewrî xelkê Reqa, Tebqa û Dêrazorê kir.

Nobedar diyar dikin ku ev nobedariya gel hevgirtina gel bi parastina bendavê û piştgiriya hêzên QSDˋê û YPJˋê li dijî dagirkeran nîşan dide.

HEVGIRTIN Û BERXWEDANÎ

Di pêşwazîkirina gel de hevseroka Meclisa bajarê Dirbêsiyê Raziye Îbrahîm axivî û got: "Nobedarên li Bendava Tişrînê bi berxwedana xwe rastiya şerê gel ê şoreşgerî nîşan da û li hember êrişên dagirkeriya Tirk û çeteyên wê xwe bi lehengî sekinîn. QSDˋê li dijî êrişên hovane berxwedaneke dîrokî dinivîsîne."

Raziye bang li partiyên siyasî yên Kurdî kir ku nakokiyên xwe bidin aliyekî û li gorî pêvajoya heyî tev bigerin û got: "Têkoşîna komînal rêya yekane ya îsbatkirina rastiya berxwedana gel e."

PEYAMÊN NOBEDARANA JI CÎHAN RE

Ajansa me nêrînên nobedarên girtin. Nobedaran got tevî êrişên dewleta Tirk a dagirker û çeteyên wê li derdora bendavê lê berxwedana her bilind dibû.

Telal Mihemed ê ji Dirbêsiyê ye û tev li çalakiya nobedariyê bûbû got: "Tiştê li Bendava Tişrînê diqewime nîşaneya hovîtiya dagirkeriya Tirk e. Divê civaka navneteweyî bilez û bez tev bigere û van êrişan bi dawî bike."

Reca Mihemed ku li bendavê nobedar bû got: "Tevî dengên topbaran û bomebaranê, lê tilîliyên dayikan moralê wan bilind dikirin. Em amade ne dîsa vegerin bendavê û berxwedanê mezin bikin."

Her wiha Heysem Mihemed jî yê ku bendav bi sembola berxwedanê bi nav kiriye got: "Bendava Tişrînê kelha berxwedanê ye. Divê tevahî pêkhate hevgirtin bin û destkeftiyên şoreşa xwe biparêzin."

HEVGIRTIN BERXWEDANÊ XURT DIKE

Gelê Bakur û Rojhilatê Sûriyeyê li dijî êrişan hevgirtî ye û peyam da û got ew amade ne li hember hewldanên dagirkirinê destkeftiyên şoreşê biparêzin.

(fr)

ANHA

DIRBÊSIYÊ

HESEKÊ