Însiyatîfa Azadiya Rêber Abdullah Ocalan navenda xwe li Kobanê vekir

Navenda Şaxê Kantona Firaêt ya Însiyatîfa Sûriyeyê ya Azadiya Rêber Abdullah Ocalan îro bi merasîmekê li bajarê Kobanê hat vekirin.  Bi sedan şêniyên kantona Firatê, endamên sazî û dezgehên Rêveberiya Xweser û rêxistinên jinan beşdarî merasîmê bûn.

Merasîm bi deqeyek rêzgirtin dest pê kir. Piştre Berdevka Şaxê Kantona Firatê ya  Însiyatîfa Sûriyeyê Azadiya Rêber Abdullah Ocalan Eyşe Efendî axivî. Eyşe Efendî bal kişand ser berxwendana li hember komploya navneteweyî ya li dijî Rêber Abdullah Ocalan û wiha got: "Berxwedana gel û çalakiya berxwedêrên ’tu kes nikare roja me tarî bike’ komplo pûç kir û dawî li  cezayê îdamê yê li dijî Rêbertî hatibû birîn, anî.  26 sal e li her deverên Kurdistanê gel ji bo azadiya fîzîkî ya Rêber Apo di nava têkoşînê de ye. Me çawa çeteyên DAIŞ`ê di Kobanê de têk bir, em ê bi wê têkoşîn û berxwedana xwe azadiya fîzîkî ya Rêber Apo mîsoger bikin."

Berdevkê Însiyatîfa Sûriyeya Azadiya Rêber Abdullah Ocalan Ferzende Munzur vekirina navenda însiyatîfê li bajarê Kobanê li Rêber Abdullah Ocalan, gelê Kobanê û şehîdên azadiyê pîroz kir û ev tişt anî ser ziman: "Vekirina vê  navendê di Roja Şehîdan (18 Gulanê) ku roja dîrokî ye pîroz be."

Ferzende Munzur di dewama axaftina xwe de hêviya serkeftinê ji kar û xebatên însiyatîfê re xwest û got: "Em bi hêvî ne ku şaxê kantona Firatê yê Însiyatîfa Sûriyeyê ya Azadiya Rêber Abdullah Ocalan dê karibe ramanên Rêber Abdullah Ocalan li civakê belav bike û ji bo azadiyê fîzîkî ya Rêber Abdullah Ocalan têkoşînê xut bike."

Piştî axaftinan dayika sê şehîdan (Barîn, Botan û Baran) Helîme Reşo qurdêleya bi rengên kes, sor û zer birî. Gel jî derbasî hundirê navendê û wêneyên Rêber Abdullah Ocalan û yên şehîdan diyarî endamên însiyatîfê kirin.

Hêjaye bibîrxistinê ye ku li Qamişlo û Helebê jî navendên Însiyatîfa Sûriyeyê ya Azadiya Rêber Abdullah Ocalan hatibûn vekirin.

(sş/bb)

ANHA