Îlham Ehmed agahiyên têkildarî civîna Şamê û entegrasyonê parve kirin 

Têkildarî civîna ku 15’ê Nîsanê li Şamê di navbera Fermandarê Giştî yê QSD`ê Mazlûm Ebdî, Hevseroka Daîreya Têkiliyên Derve ya Rêveberiya Xweser Îlham Ehmed û Serokê Hikumeta Demkî ya Suriyeyê Ehmed El Şeri de pêk hatibû, dîsa der barê asta xebatên entegrasyonê, astengî û zehmetiyên heyî de, Hevseroka Daîreya Têkiliyên Derve ya Rêveberiya Xweser Îlham Ehmed ji ANHA`yê re axivî.

JI PERWERDEYÊ WÊ BIRYAR WERE GIRTIN

Îlham Ehmed destnîşan kir ku di civîna li Şamê de li ser astengiyên di pêkanîna pêvajoya entegrasyonê de rawestîne. Ji bo rakirina astengiyan herdu alî (Rêveberiya Xweser û Şam) di nava hewldanan de ne.

Hevseroka Daîreya Têkiliyên Derve da zanîn ku yek ji mijarên civînê sîstema perwerdeyê ku heya niha bawernameyên xwedekaran nehatine erêkirin û got:“Gelek dem di ser lihevkirina 29'ê Çileyê re derbas bû, lê hîn ev mijar nehatiye çareserkirin. Me li hev kir ku di demek nêzîk de wezîrê perwerdeyê û wezîrê xwendina bilind ji bo danîna mekanîzmeyekê, sardana parêzgeha Hesekê bikin û vê mijarê bi dawî bikin. Her wiha derbarê sîstem û zimanê xwendinê  de di dema pêş de wê hevdîtin werin kirin û biryar werin girtin.”

Îlham Ehmed da zanîn ku heta niha di aliyê pergala îdarî de tenê li ser mijarên tenduristî û perwerdeyê erkdarkirina midûriyetan hatiye çêkirin, mudîriyetên ku hîn nehatine diyarkirin jî, bi lezgînî wê bên diyarkirin. Ji bo vê mijarê jî wê mekanîzmeyek nû were danîn da ku erkdarkirina di saziyan de jî bi dawî bibe.

RÊVEÇÛNA ENTEGRASYONÊ

Îlham Ehmed bi bîr xist ku di çarçoveya entegrasyonê de hinek gav hatine avêtin, lê pêvajo giran dimeşe.  

Îlham Ehmed anî ziman ku di warê erkdarkirina temsîliyeta herêman de gavên erênî hatine avêtin, lê hîn gavên ku divê têkildarî erkdarkirinên wezaret û mudîriyetan bên avêtin jî hene.

DERIYÊN SÎNOR

Li ser pergala deriyên sînor ku mijarek bingehîn a entegersayonê ye, Îlham Ehmed bilêv kir ku mekanizmaya rêvebirina deriyê Sêmalka û deriyên din ên sînorî hatiye avakirin, di çarçoveya tekamulan de kesên karmend ên ku bi navê Rêveberiya Xweser kar dikirin, li ser esasê entegrasyonê xebat didomînin.

PIRSGIRÊKÊN DERDIKEVIN

Îlham Ehmed da zanîn ku di milê pêkanîna mekanîzmeyê de gelek pirsgirêk derketine û ev pirsgirêk wiha rêz kirin: “Berpirsên hinek mûdiriyetan ên li parêzgehê beriya niha ji aliyê hikumeta demkî ve piştî ku rejîma Esed rûxiya hatibûn diyarkirin. Ev jî bi xwe re pirsgirêkê derdixe. A rast ew e ku lihevkirin der barê wan berpirsyaran de hebe.  Gelek karmendên Rêveberiya Xweser hene, divê ev karmend li derveyî kar nemînin. Divê ji bo erkdarkirina kesên ku Rêveberiya Xweser pêşkêş dike û yên hikumeta demkî diyar dike de lihevkirinek hebe. Rêveberiya Xweser demeke dirêje kar dimeşîne û bûye xwedî tecrubeyek, divê ev li ber çavan bê girtin. Hem temsiliyet û hem tecrube û ezmûn di diyarkirina berpisyaran de girîng in. Guhertin wê li ser esasê pisporiyê pêk were. A girîng xizmeta civakê û temsîliyet e. Li vê deverê Kurd, Suryan û Ereb bi hev re dijîn.”

MIJARA JIN Û ASTENGÎ

Îlham Ehmed diyar kir ku mijara temsiliyet û îradeya jinan hîn jî pirsgirêk e û got: “Di Rêveberiya Xweser de hejmareke zêde ya jinan kar dimeşand. Di aliyê heykelî de şêwazên saziyên Rêveberiya Xweser û yên hikumetê ne wekî hev in, heta radeyekê dişibin hev lê di asta rêvebirina miduriyetan de ne weke hev in. Di çarçoveya entegrasyonê de ji bo erkdarkirinê navên jin û mêran jî tên pêşkêşkirin. Heta niha midûrên saziyên perwerde û tenduristiyê hatine erkdarkirin, lê herdu jî mêr in. Lewma divê tevlîkirina jinan weke xisûsiyetekê di ber çavan re were girtin û roleke girîng were dayîn. Di vê mijarê de zehmetî û astengiyên cidî hene.”

‘YPJ DI ROJEVÊ DE YE’

Îlham Ehemd bal kişand ku yek ji mijarên li pêşiya wê asteng hene jî, mijara YPJ`ê ye û wiha dom kir: “Her çiqasî di nîqaşan de encamek nû ji bo YPJ’ê derneketibe jî, lê ew hîn di rojevê de ye. Nîqaşa li ser fermîkirina YPJ`ê di rojeva hikûmeta demkî de ye jî. Ev dê heta pêkanîna lihevkirinekê dewam bike.”

Yek ji mijarên entegrasyonê jî hilbijartina nûnerên parêzgehên Hesekê û Kobanê ji bo parlamentoyê (Meclisa Gel a Suriyeyê) ye. Têkildarî mijarê Îlham Ehmed da zanîn ku amadekariya vê xebatê bi rêya komîteyeke navendî û komîteya amadekar a Parêzgeha Hesekê tê meşandin û got, komîteya amadekar xwedî înîsiyatîf e.

ŞAREDARÎ WÊ BÊN BIRÊXISTINKIRIN

Di axaftina xwe de Îlham Ehmed behsa pergala şaredariyên gel ên li Rojava jî kir û diyar kir ku şaredarî di çarçoveya sîstema nû de çiqasî ji bo civakê xizmetê bikin, wê parêzgeha Hesekê jî ewqas jî zûtir karibe xwe nû bike û got, demokrasî li ser temsîliyet û xizmeta civakê pêş dikeve, lewma divê ew xwe ji bo pêvajoya nû amade bikin.

XEBATÊN DESTÛRA BINGEHÎN

Girêdayî mijara amadekirina destûra bingehîn a nû ya Sûriyeyê jî Îlham Ehmed da zanîn ku piştî mijara diyarkirina nûnerên Rojava yên ji bo parlamentoyê, dê meseleya destûrê jî cidî têkeve rojevê û got: “Dê Kurd jî cihê xwe di komîteya nivîsandina destûra nû ya Sûriyeyê de bigirin. Pêwîstiya Suriyeyê bi destureke bigehîn a nû heye û ji bo wê pêwîstî bi komîteyeke ku temsîla hemû neteweyan bike heye. Kurd jî şirîkên esasî yê avakirina vî welatî ne. Lewma divê rolek esasî ya wan hebe. Ev jî di dema pêş de wê pêk were.”

Hevseroka Daîreya Têkiliyên Derve ya Rêveberiya Xweser Îlham Ehmed di dawiya nirxandinên xwe de diyar kir ku mijara dilgirtiyan hîn di rojevê de ye û wan di hevdîtinan de bal kişandiye ku di zûtirîn dem de tevahî girtî werin berdan.

(sb/a)

ANHA