‘Ez dixwazim bizanim ka çi li keça min hatiye’

Izdîhar Dawûd Hisên ji gundê Agûla yê bajarê Qamişlo ye. Ji aliyên têkildar dixwaze ku çarenûsa keça wê Eyşe Abdulwehat El Elî (16) zelal bikin. 6`ê Çileyê dema ku hikumeta demkî ya Sûriyeyê êrişî taxa Şêxmeqsûd û Eşrefiyê kir, Eyşe El Elî winda bûye û heyanî niha dayika wê tu agahî jê wernagire. 

Dayika Eyşê Izdîhar got: “Tenê ev keça min heye. Dema ku em 2013`an ji Şamê hatin gundê xwe Agûla hevjînê min li gel rejîma berê ya Şamê winda bû û vê dawiyê min bihîst ku wefat kiriye, niha jî keça min winda bûye û ez tu agahiyê jê wernagirim."

Izdîhar Hisên diyar kir ku ev bûye 11 meh keça xwe nedîtiye û wiha got: “Keça min 2025`an derbasî Helebê bû. 6`ê Çileya 2026`an wexta ku şer dest pê kir têkiliya min bi keça min re qut bû. Min ji hevalên wê bihîst ku dema şer dijwar bûye ew li Şêxmeqsûd bû û ji hev belav bûne. Bi rêyên nefermî min bihîst ku keça min di girtîgehên hikumetê de ye. Ez nizanim ka keça min sax e, şehîd e, birîndar e yan jî dîl ketiye destê hikumetê?"

Izdîhar Dawûd Hisên wiha dawî li gotinên xwe anî: “Ez tenê dixwazim bizanim ku keça min li ku derê ye, sax e yan na. Bendewariyê ez gelekî westandin. Em hêvî dikin ku bi me re bibin alîkar ku em bigihêjin zarokên xwe."

(np)

ANHA