Di pêşangeha Pirtûkên Kurdî de pirtûka "Pencereya Pêşîn" hat îmzekirin

Pêşangeha Pirtûkên Zimanê Kurdî ku bi boneya Cejna Zimanê Kurdî (15 Gulan) ji aliyê Meclisa Wêjeyê ya Rojava-Qamişlo, bi dirûşma “Zimanê me mafê me yê rewa ye” hate vekirin di roja xwe ya duyemîn de didome.

Pêşangeh li Pirtûkxaneya Şilêr a Qamişloyê, bi serdana şênî, xwendekar, rewşenbîr, nivîskar û rojnamevanan dewam dike.

Di pêşangehê de pirtûka 4 jinên ciwan a bi navê "Pencereya Pêşîn" hat îmzekirin.

PIRTÛKA “PENCEREYA PÊŞÎN”

Pirtûka Pencereya Pêşîn ji aliyê 4 jinên ciwan ên bi navên Roja Mihemed, Dilîn Ebdulrehman, Nesrîn Yûnis û Ciwana Hisên, di sala 2023`yan de bi rêya komxebateke wêjeyî hatiye nivîsandin.

Ev komxebat wêjeyî ya bi navê `Komxebata Geşkirina Behremendiya Wêjeyî ya Jinên Ciwan’ di sala 2023`yan ji aliyê Dîwana Wêjeyê, ji bo fêrbûna şêwazê nivîsandinê, hatibû lidarxistin.

Ev berhem cara yekemîn di 9`emîn Pêşangeha Şehîd Herekol a Pirtûkan a Nevneteweyî de hate pêşkêşkirin.

Pirtûka ji 4 çîrok, 28 helbestên bi zimanê Kurdî û 12 çîrokên bi zimanê Erebî pêk tê, ji aliyê Weşanên Şilêr û Dîwana Wêjeyê ya Bakur û Rojhilatê Sûriyeyê ve hatiye amadekirin, sala 2025`an li Weşanxaneya Şilêr hatiye çapkirin.

Sibe (14 Gulan) pêşangeh bi dawî dibe.

(sb/fr)

ANHA