Ciwanan fermandar Alî Haydar Kaytan û Riza Altûn bi bîr anîn

Li gelek bajarên Herêma Bakur û Rojhilatê Sûriyeyê jinên ciwan û ciwanên şoreşger û şêniyan û koçberên Efrîn û Şehbayê bi meş û pêşxistina mûman fermandar şehîd Alî Haydar Kaytan û Riza Altûn bi bîr anîn.

REQA

Di merasîmê de hevseroka Tevgera Ciwanên Şoreşger a kantonê Letîfe El Hesen şehîd Alî Haydar Kaytan û Riza Altûn bi bîr anîn û rola wan di damezirandina PKK'ê de û têkoşîna wê ya şoreşgerî silav kir.

Letîfe El Hesen got PKK’ê ji bo aştî û demokrasiyê tê koşiya û got: "Piştî lidarxistina kongreya 12'emîn û pejirandina rêbaza pêvajoya siyasî em jî wekî ciwanên şoreşger li ser şopa Rêbertî bin û em ji bo pêkanîna azadiya wî ya fîzîkî û pêkanîna serkeftinê têkoşînê bidomînin."

Piştre li ber wêneyên Rêber Abdullah Ocalan û şehîd Alî Haydar Kaytan û Riza Altûn mûm hatin pêxistin.

Di dawiya merasîmê de karwanê wesayîtan li nav kolanên bajêr geriya.

KOBANÊ

Têkildarê mijarê gelê Kobanê her du şehîd li Pakrewangeha Şehîd Dicle bi merasîmeke biheybet bi bîr anîn.

Di merasîmê de endamê Tevgera Ciwanên Şoreşger a Sûriyeyê Mihemed Mihemed axivî û diyar kir ku heta kêliya dawiyê her du têkoşeran bê berdêl û bê dudilî ev şoreş dimeşandin û got: "Bi fedakariya şehîd Alî Haydar Kaytan û Riza Altûn em li tevahî cîhanê hatin naskirin. Bi keda van hevalan Kurdan di nava dîrokê de gavekî mezin bi pêş de avêt. Em bi saya wan li vir dijîn. PKK’ê li her derê têkoşîneke bêhempa ji bo mirovahiyê pêşkşê kir. Her wiha bi saya PKK’ê hewldanên desthilat ên têkçûna civaka Kurd hatin têkbirin."

Mihemed anî ziman ku bi saya şehîdan ev li vir dijîn û got: "Di nava 52 salan de me bi şehîdan xwe da îsbatkirin. Em çendî jî qala her du fermandarên pêşeng bikin, em ê kêm bimînin û nikaribin fedakariyên wan derbirînin û em ê deyndar bin. Ji bo vê jî banga ku Rêber Apo kirî bangeke xwedî aştî û azadî ye. Li ser wê bingehê PKK’ê kongreya xwe ya 12’yemîn li dar xist û dest bi pêvajoya aştiyane û demokratîk kir."

Mihemd di dawiyê de got: "Em wek ciwan em ê heta dawiyê ji bo aştî û civaka demokratîk tê bikoşin û xwedî li şehîdên xwe derkevin."

Dûre find li dora wêneyê her du fermandarên şehîd hatin pêxistin.

Partiya Karkerên Kurdistan PKK’ê îro encama danezana kongreya xwe ya 12’emîn eşkere kir. PKK’ê di nava encama danezana kongreyê de, şehadeta kadroyên pêşeng Fûat- Alî Haydar Kaytan û Riza Altûn jî ragihand. Fûat- Alî Haydar Kaytan di 3’yê Tîrmeha 2018’an de û Riza Altûn di 25’ê Îlona 2019’an de şehîd bûbûn.

TEBQA

Bi beşdariya bi dehan malbatên şehîdan, xelkê Tebqayê, koçberên Efrîn û Şehba yên li kantonê bi cih bûne û endamên Yekitiya Jinên Ciwanan li goristana şehîdan a li aliyekî Tebqayê merasîma bibîranînê ya fermandar şehîd Alî Haydar Kaytan û Riza Altûn hat lidarxistin.

Di merasîmê de endamê Komîteya Malbatên Şehîdan a Bakur û Rojhilatê Sûriyeyê Selah Îbrahîm têkoşîna her du şehîdan bi bîr xist û got: "Em îro piştî ragihandina şehadeta du fermandarên pêşeng ên Partiya Karkerên Kurdistanê (PKK) kom bûn, ku jiyana xwe ji bo xizmeta doza gelên bindest terxan kirin. Ew şehîd Alî Haydar Kaytan û Riza Altûn in û her du ji damezrandina tevgerê ve hevrêyên Rêber Abdullah Ocalan bûn û di avakirina stûnên pêşîn ên ramana îdeolojîk û siyasî ya partiyê de roleke bingehîn lîstin."

Îbrahîm diyar kir ku her du şehîdan li çar parçeyên Kurdistanê têkoşîn kir û ragihandina şehadeta wan di kongreya 12’yemîn a PKK’ê de teqeziya li ser berdewamkirina têkoşîna wan heta dawiyê ye."

Di merasîmê de sînevîzyonek li ser jiyan û têkoşîna her du şehîdan hat pêşandan.

Çalakî bi diruşmên "şehîd namirin" bi dawî bû.

QAMIŞLO

Tevgera Ciwanên Şoreşger li bajarê Qamişloyê ji bo bibîranîna her du şehîdan Riza Altûn û Alî Haydar Kaytan bi diruşma "Bi rihê Fûat û Riza em kongreya 12’emîn a PKK’ê silav dikin" meşek li dar xist. Di meşê de bi dehan xelkê Qamişlo û ciwanên şoreşger amade bûn.

Meş ji Çerxerêya Elef heta bi Pakrewangeha Şehîd Delîl Saroxan dest pê kir. Di meşê de beşdaran mûm pêxistin û wêneyên her du şehîdan, alên tevgera ciwanên şoreşger û alên PKK’ê hildan.

Li pakrewangehê li ser navê Meclisa Malbatên Şehîdan Mihyedîn Hesen axivî  û got: "Em her du şehîdan Riza Altûn û Alî Haydar Kaytan û tevahî şehîdên azadiyê bi bîr tînin û soza şopandina rêça wan nû dikin."

Dûre endamê Tevgera Ciwanên Şoreşger Rojvan Qamişlo li ser navê tevgera ciwanan daxuyaniyek xwend û got: "Ji vir heta bi Îmraliyê em silavên xwe ji Rêber Abdullah Ocalan re dişînin û soz didin şehîd Riza Altûn û Alî Haydar Kaytan ku li ser şopa wan bin. Em kongreya 12’emîn a PKK’ê silav û pîroz dikin."

Meş bi diurşmên "Şehîd namirin" û"Bê Serok Jiyan Nabe" bi dawî bû.

(ekîb/fr)

ANHA