Çîroka şervanekî dîlgirtî ku malbata wî li bendê ye

Bi dengekî tijî fikar û bendewarî Nayif Hisên çîroka kurê xwe Elî Esker ê şervanê Hêzên Sûriyeya Demokratîk vedibêje ku berî çend salan tev li berxwedanê bûye û niha ji hêla hikumeta demkî ya Sûriyeyê ve li zindana Helebê girtî ye.

Elî Esker di dawiya sala 2011`an de berî ragihandina wan a fermî, tev li Yekîneyên Parastina Gel (YPG) bû. Ew beşdarî piraniya şerên rizgarkirinê yên li dijî çeteyên DAIŞ`ê bû. Ew di dema têkoşîna xwe de 4 caran birîndar bû.

Nayif Hisên diyar kir ku kurê wî Elî Esker vê dawiyê nexweş bû û diyar dike ku ew emeliyat bûye, lê cihê emeliyatê bi tevahî baş nebûye. Tevî vê yekê Elî dema ku êriş dest pê kir çûye Dêr Hafirê. Nayif Hisên wiha domand: "Di roja dawîn a berî vekişîna ji Dêr Hafirê de, me bi wî re axivî. Wî got ku pevçûnek çêbûye, dûv re şer û topbaran rawestiya, û agirbest û peymana vekişînê hatiye çêkirin û ew ê saet 7:00 sibehê vekişi."

‘WAN XIYANET LI ZAROKÊN ME KIR’

Hisên diyar kir ku roja din, têkiliya bi kurê wî re qut bûye. Hisên tiştê ku qewimî wiha vegot: "Tevî peymanê, wan xiyanet li zarokên me kir. Wan xiyanet li wan kir û niha ew girtî ne."

Hisên ji hevalekî kurê xwe hin agahî wergirtin e ku "Yek ji hevalên wî yên ji taxa Zeytûniyê serbest hat berdan û ji me re got ew û kurê min Elî di heman hucreyê de li girtîgeha Helebê ne û ji ber emeliyatê tenduristiya wî ne aram e."

MALBAT LI BENDA WÎ YE

Hisên diyar kir ku Elî zewicî ye û 3 zarokên wî hene û hevser û zarokên wî li benda wî ne. Hisên gotinên xwe bi daxwaza serbestberdana girtiyan bi dawî kirin: "Em serbestberdana girtiyên xwe û şervanên xwe, şervanên vî gelî û vê axê dixwazin.”

Kurekî Nayif Hisên ku şervanê Yekîneyên Parastina Gel (YPG) bû di sala 2015’an de li herêma Sulukê ya li başûrê bajarê Serêkaniyê şehîd bûye.

(k)

ANHA