Cenazeyê şehîd Fayîz Ebdî bi merasîmekê hat veşartin

Endamê Hêzên Ewlekariya Hundirîn Fayîz Feysel Ebdî yê ku 18‘ê Çileya îsal li ser rêya Ebyet şehîd bûbû, îro bi merasîmekê hat oxirkirin.

Merasîm ji aliyê Meclisa Malbatên Şehîdan a bajarê Amûdê ve li Pakrewangeha Şehîd Îsmaîl Hogir hat lidarxistin. Di merasîmê de şênî tevî endamên saziyên sivîl û Asayîşê pêk hat.

Girseyê wêneyên şehîd, alên Meclisa Malbatên Şehîdan, Asayîş, YPJ û YPG‘ê hildan. Merasîmê bi deqeyeke rêzgirtinê dest pê kir. Piştre bi navê Meclisa Malbatên Şehîdan û Hêzên Ewlekariya Hundirîn Ebdurehman Enter axivî û sersaxî ji malbata şehîd re xwest.

Enter di axaftina xwe de soza şopandina rêya şehîdan da û got: "Di şexsê şehîd Fayîz de em ê berxwedanê bidomînin ta hemû komplo û êrişên li ser herêmên me têk bibin."

Bi navê Kongra Star Nûra Hesen jî anî ziman ku bi saya keda şehîdan e bi rûmet û ewle li ser axa xwe dijîn. Her wiha got, fedakariyên şehîdan dê jêdera hêzê û îradeya domandina têkoşînê bimîne.

Piştî axaftinan wesîqeya şehîd hat xwendin û radestî malbata wî hat kirin. Li ser daxwaza şehîd cenazeyê wî birin gundê Dîkê û li wir hat veşartin.

(bb)

ANHA