Cenazeyê şehîd Emar Hemo hat veşartin

Endamê Hêzên Ewlekariya Hundirîn Emar Hemo li Amûdê hat oxirkirin.

ROJANE

13 kanûn, 2023 19:23

QAMIŞLO

Endamê Hêzên Ewlekariya Hundirîn Emar Hemo yê dema erka xwe bi cih dianî şehîd bû, bi beşdarbûna xelkê navçeya Amûdê û gundewarê wê li Pakrwangeha Şehîd Îsmaîl a li navçeyê hat veşartin.

Di merasîm de endama Meclisa Malbatên Şehîdan a Amûdê Xaliya Hec Qasim axivî, diyar kir ku şehîd Amar bi salan di nava hêzên ewlekariyê û şoreşa Bakur û Rojhilatê Sûriyeyê de têkoşîn kir. Xaliya got: "Em soz didin em ê wefadarên xwîna şehîdan bin. Ji bo pêkanîna armancên wan em ê heta dilopa dawîn a xwînê tê bikoşin."

Ji rêveberên Hêzên Ewlekariya Hundirîn ên Hesekê Idrîs Osê jî behsa têkoşîna şehîd Amar kir û got, xwedî rihekî xurt ê hevaltiyê bû, erkên xwe yên parastina ewlehiya herêmî û gelên xwe ji gefan bi rêk û pêk bi cih dianî.

Osê soza domandina rêya şehîdan da.

Di dawiyê de wesîqeya şehadetê ya şehîd Emar Hemo hat xwendin û radestî malbata wî hat kirin. Cenazeyê şehîd bi tilîliyên dayikan û dirûşmên "Şehîd namirin" hat veşartin.

(bb)

ANHA